Марказий сайлов комиссияси 22 декабрда парламент ва маҳаллий кенгашларга бўладиган сайловларда депутатликка номзодларни кўрсатишда сиёсий партиялар ишига маҳаллий ижроия ҳокимияти органлари, ҳокимлар томонидан аралашиш ҳолатлари бўлаётгани тўғрисида ижтимоий тармоқлардаги хабар ва ахборотларга эътибор қаратди, деб хабар беради Марказий сайлов комиссияси Халқаро матбуот маркази.
«Марказий сайлов комиссияси қайд этадики, Сайлов кодексининг 37-моддасига мувофиқ Ўзбекистон Олий Мажлиси Қонунчилик палатаси депутатлигига номзод, маҳаллий Кенгашлар депутатлигига номзод кўрсатиш ҳуқуқига сиёсий партиялар эгадир.
Бу ҳуқуқ сиёсий партияларнинг мутлақ ваколати ҳисобланади.
Сиёсий партияларнинг депутатликка номзод кўрсатиш ишига ноқонуний аралашиш қонун билан таъқиб қилинади ва жавобгарликка сабаб бўлади.
Марказий сайлов комиссияси юқоридаги каби ҳолатлар мавжуд бўлса, асослантирилган фактлар билан ҳуқуқни муҳофаза қилувчи идораларга мурожаат қилишингизни ва бу тўғрида Марказий сайлов комиссиясини хабардор қилишингизни сўрайди.
Шунингдек, ушбу ҳолатлар юзасидан Марказий сайлов комиссиясининг 1197 рақамли ‘Ишонч телефони’га ҳам мурожаат қилишингиз мумкин», — дейилади Марказий сайлов комиссияси хабарида.
Изоҳ (0)