Ўзбекистонда 2019 йилнинг январь—сентябрь ойларида жами 50 922,2 миллиард сўм қурилиш ишлари бажарилган бўлиб, ўсиш суръати ўтган йилнинг мос даврига нисбатан 119,3 фоизни ташкил этди. Бу ҳақда Давлат статистика қўмитаси маълумотларида келтирилди.
Жорий даврда жами қурилиш ишлари ҳажми таркибида йирик қурилиш ташкилотлари томонидан бажарилган қурилиш ишлари ҳажми 12 410,2 миллиар сўмни ташкил этган. Ўтган йилнинг шу даври билан солиштирганда 4,5 фоизга кўп ишлар бажарилган бўлиб, жами қурилиш ишлари ҳажмидаги улуши ўтган йилдаги кўрсаткич даражасидан 3,3 фоиз пунктга камайган.
Кичик корхона ва микрофирмалар томонидан бажарилган қурилиш ишлари ҳажми жорий даврда қурилиш ишларини бажарган бошқа ташкилотларга нисбатан кескин ошганлиги кузатилган. Улар ҳиссасига жами қурилиш ишлари ҳажмининг 54,3 фоизи тўғри келиб, ўтган йилнинг шу давридаги кўрсаткичга нисбатан 5,2 фоиз пунктга кўпайган.
Шунингдек, улар ҳиссасига тўғри келган қурилиш ишлари ҳажми ўтган йилнинг мос даврига нисбатан 131,7 фоизни ташкил этган ҳолда 27 646,7 миллиард сўм миқдорида қайд этилди.
Норасмий сектор ҳиссасига тўғри келган қурилиш ишлари улуши ўтган йилдаги кўрсаткичга нисбатан 1,9 фоиз пунктга камайиб, 21,3 фоизни ташкил этди ва 10 865,4 миллиард сўм миқдорида қайд этилди. Ўтган йилнинг мос давридаги ҳажм билан солиштирганда 110,9 фоизни ташкил этгани кузатилган.
Давлат мулкчилигидаги ташкилотлар томонидан жами 3 150,8 миллиард сўм ёки 2018 йилнинг январь—сентябрига нисбатан 154,7 фоиз қурилиш ишлари бажарилган, нодавлат мулкчилигидаги ташкилотлар томонидан эса 47 771,4 миллиард сўм ишлар бажарилиб, ўсиш суръати 117,6 фоизни ташкил этди. Уларнинг республикадаги улушлари мос равишда 6,2 фоиз ва 93,8 фоизни ташкил этди.
Изоҳ (0)