Ливан ҳукумати мамлакатда фуқаролар ўтказаётган норозилик намойишларини тўхтатиш мақсадида вазирлар ва депутатларнинг маошини 50 фоизга қисқартиришга қарор қилди. Ливан бош вазири Саад Ҳаририй вазирлар маҳкамасининг кичик таркибда ўтказилган йиғилишида инқироздан чиқиш бўйича янги режасини муҳокама қилган. Бу ҳақда «ТАСС» хабар берди.
Янги ислоҳотлар режасига кўра, Ливан ҳукумати банклар ва суғурта компанияларининг даромад солиғини 25 фоизга кўтаради, шунингдек, мамлакатдаги телекоммуникациялар соҳаси корхоналари хусусийлаштирилади.
Ҳаририй аввал эълон қилинган давлат сектори ҳамда ҳарбийларга нисбатан ижтимоий тўловлар ва пенсияни қисқартириш бўйича қарорнинг бекор қилинганини билдирган. Иқтисодиётни барқарорлаштириш юзасидан тезкор чора-тадбирларни амалга ошириш учун Ливан марказий банки ва хусусий банклар томонидан ҳукуматга 3,5 миллиард АҚШ доллари миқдоридаги маблағ ажратилади.
Бош вазир режасининг асосий мақсадлари Байрутда ва мамлакатнинг бошқа шаҳарларида давом этаётган норозиликларнинг тўртинчи кунида эълон қилинди. Хабарларга кўра, 20 октябрь, якшанба куни намойишларда иштирок этаётган фуқароларнинг сони 1,5 миллион нафарга етган.
Парламент депутати Шамил Роккуз намойиш иштирокчилари коалицион ҳукуматнинг кечга қолиб амалга оширган чора-тадбирларини энди қабул қилмаслигини қайд этди.
«Вақт бой берилди ва Ҳаририй ҳукумати истеъфога чиқиши лозим. Ливанда давом этаётган оғир иқтисодий инқироз вақтида профессионаллардан ташкил топган ва давлатни ушбу вазиятдан қутқара оладиган ҳукуматга эҳтиёж туғилган», — дейди депутат.
19 октябрда Байрутда митинг ўтказган норозиликлар иштирокчилари ҳукумат истеъфоси, парламентнинг тарқатилиши ва Ливанда муддатидан аввал сайловлар ўтказилишини талаб қилган.
Изоҳ (0)