Туркия АҚШ билан келишувга қарамай Сурия шимолидаги операцияни давом эттирмоқда

Туркия ҳарбий кучлари АҚШ билан келишувга қарамай Сурия шимоли-шарқидаги Рас ал-Айн шаҳрида ҳарбий ҳужумни давом эттирмоқда. Бу ҳақда Al-Mayadeen телеканалига асосланиб «ТАСС» хабар берган.

Хабарга кўра, турк ҳарбийлари Рас ал-Айн туманидаги бир нечта қишлоқларга артиллерия зарбасини йўллаган. Шунингдек, Анқара томонидан жанг қилаётган жангарилар гуруҳи Рас ал-Айнга йўл олаётган ижтимоий ёрдам карвонига ҳам ҳужум уюштирган.

Аввал Reuters агентлиги шаҳарда отишма ва тўқнашувлар бошлангани, ўқ овозлари эшитилаётгани, мавзелардаги бинолардан тутунлар кўринаётганлигини хабар қилган.

Туркия ҳукумати ушбу воқеалар юзасидан расмий изоҳ бермаган. 17 октябрь, пайшанба куни АҚШ ҳамда Туркия ўртасида Анқарада Суриядаги «Тинчлик булоғи» ҳаракатларини тўхтатиш юзасидан музокаралар ўтказилган. Туркия «Сурия демократик кучлари» курдлари чегара ҳудудини тарк этиши учун ҳарбий ҳаракатларни 120 соатга тўхтатишга розилик берган.