«Замон» информацион дастури Наманган вилояти Чуст туманининг «Ғова» қишлоғида «Қизил китоб»га киритилган қўнғир айиқ ўлдирилгани тафсилотларини ўрганди.
Маълум бўлишича, Гулбаҳор исмли аёл тоғли Ғова қишлоғига адашиб ёки очликдан тентираб келган тўқ сариқ —тилларанг тусдаги қўнғир айиқни ўз ҳовлисида қўйларига ўт солаётганида кўриб қолган.
Аёл тош отганидан кейин айиқ қўшни ҳовлига ўтиб кетиб, қўшни хонадоннинг ҳожатхонасида 2 соатдан ортиқ беркиниб турган. Одамлар йиғилиб шовқин бошлангач, ташқарига чиқиб, ўкириб, дуч келган томонга отила бошлаган. Бу пайтгача маҳаллий аҳоли кўплаб давлат идораларига телефон қилиб ёрдам сўрашга улгурган. Воқеа жойига маҳалла фаоллари, овчилар ва экология қўмитаси вакиллари келган.
Айиқ Гулбаҳор опанинг қўшниси Соҳибжон Маҳмудовнинг оғилхонасига ўзини урган. Инсонларга жиддий хавф туғдириши мумкинлиги назарда тутилиб, овчиларга айрим мутасаддиларнинг оғзаки топшириқлари билан айиқни отиб ўлдиришга қарор қилинган.«Қизил китоб»га киритилган айиқни отиш учун маҳаллий овчилар жалб қилинган. Мелиқўзи Холматов оғилхонанинг том қисмидан бир марта, ёнидаги шериги 2 марта ўқ узиб айиқни ўлдирган.
https://youtu.be/E5UCLf9n5ko
«Овчилик жамияти раиси тезда бориб айиқни ўлдирмасдан, имкон даражасида сақланглар деди. Мен боғдаги овчиларга телефон қилиб айиқни отманглар дедим. Етиб келганимизда айиқ бу ерга беркиниб олган экан. Темирлар билан эшикни маҳкамладик. Айиқни ухлатиб туриб, ё бир ерга жўнатиш ёки ҳайвонот боғига топшириш ҳаракатида бўлдик. Бахтга қарши қарангки, Наманган вилоятининг бирорта жойида ухлатадиган дори ё отадиган қурол топилмади», — дейди вилоят овчилик ва балиқчилик спорт бирлашмаси раҳбари ўринбосари Анваржон Достонов.
Қайд этилишича, оғирлиги 250—300 килограмм дейилаётган айиқни 7—8 киши Дамасъга юклаган. Уни ветеринария бўлими олиб кетган. Айиқнинг кейинги тақдири номаълум.
Эслатиб ўтамиз, май ойида Қашқадарёда бир гуруҳ шахслар Халқаро қизил китобга киритилган қўнғир айиқни отиб ўлдирган эди.
Изоҳ (0)