16 октябрь, чоршанба куни Сергели тумани ИИБга 31 ёшли Александра К. мурожаат қилган. У ўз аризасида жорий йилнинг июнь ойида унга 50 минг долларини Қозоғистон Республикасида яшовчи танишларига етказишда ёрдам беришини ваъда қилган таниши 37 ёшли Артём С.га нисбатан чора кўришни сўраган. Бу ҳақда Тошкент шаҳар ИИББ томонидан хабар берилди.

Александра танишининг таклифига рози бўлиб, унга пулларни берган. Аммо Артём пулларни манзилга етказмасдан, эгасига ҳам қайтариб бермасдан ўз эҳтиёжига сарфлаб юборган.

Ушбу факт асосида Ўзбекистон Республикаси Жиноят кодексининг 168-моддаси (фирибгарлик) бўйича жиноий иш қўзғатилган. Ҳозирда тергов ишлари олиб борилмоқда.

ИИББ томонидан шунга ўхшаш бошқа ҳолат ҳақида ҳам маълум қилинди. Унга кўра, 16 октябрь куни Сергели тумани ИИБга яна бир ариза 44 ёшли Зайниддин А.дан келиб тушган. Унинг маълум қилишича, жорий йилнинг август ойида таниши бўлган Муҳиддин А. ундан Lacetti русумли автомобилини икки йил давомида муддатли тўлов эвазига харид қилиш истагини билдирган.

Улар ўзаро нархни 11 100 долларга келишиб, дастлабки тўлов тариқасида Муҳиддин 1 500 доллар тўлаган. Қолган маблағни эса Муҳиддин икки йил давомида ҳар ой 400 доллардан тўлаши керак эди.

Аммо автомобилни олгач, Муҳиддин ўз ваъдасига хилоф тарзда сентябрь ойида машинани 43 ёшли Хайрулла Р.га сотиб, Зайниддинга қолган маблағни тўламасдан, пулларни ўз эҳтиёжига сарфлаб юборган. Ушбу факт асосида ҳам Ўзбекистон Республикаси Жиноят кодексининг 168-моддаси (фирибгарлик) бўйича жиноий иш қўзғатилди.