«Ўздавкарантин» инспекцияси жорий йилнинг сўнгги 8 ойи давомида республикадан экспорт қилинган қишлоқ хўжалиги маҳсулотлари билан Ўзбекистонда мавжуд бўлган карантин организмлари бошқа давлатларга ўтиб тарқалиши ёки хориждан импорт қилинаётган карантин остидаги маҳсулотлардаги зарарли организмлар республикага ҳудудида тарқалиб кетишининг олдини олиш бўйича амалга оширилган ишлар юзасидан маълумот берди.
Жумладан, 323 тонна (шундан 235 тоннаси қўл юки, 88 тоннаси транспорт воситалари орқали), 10,25 миллион дона (шундан 41 минг донаси қўл юки, 10,21 миллион донаси транспорт воситалари орқали) ва 1317 метр куб миқдорида транспорт воситалари орқали республикага олиб кирилаётган ўсимлик маҳсулотларида зарарли организмлар аниқланганлиги сабабли чегара масканларидан қайтариб юборилган. Қайтариб юборишнинг имкони бўлмаган 3,1 миллион дона зарарланган кўчатлар эса ёқиш йўли билан тегишли тартибда йўқ қилинган.
Шунингдек, хориждан Ўзбекистонга импорт қилиниши режалаштирилган 72 тонна картошка юк эгалари томонидан тегишли ҳужжатлар қалбакилаштирилгани аниқланиб, чегарадан ўтказилмаган. Шу билан бирга, 6 500 тонна миқдоридаги уруғлик картошка ўсимликлар карантини бўйича мутахассислар томонидан фитосанитар ҳолатни ўрганиш чоғида экспорт қилувчи давлатнинг ўзида қониқарсиз деб баҳоланди ва мамлакатимизга импорт қилинишига йўл қўйилмаган.
Республикадан чет давлатларга чиқарилаётган 63,5 тонна (14,5 тоннаси қўл юки, 49 тоннаси транспорт воситалари орқали) ва 7 минг дона (5 минг донаси қўл юки, 2 минг донаси транспорт воситалари орқали) карантин остидаги маҳсулотлар фитосанитар талабларга жавоб бермаганлиги сабабли экспорт қилинишига йўл қўйилмага ва уларга нисбатан карантин тадбирлари амалга оширилиб, белгиланган тартибда ички бозорга чиқарилган.
Ўзбекистоннинг амалдаги қонунчилигига мувофиқ, экспортга жўнатилаётган ҳамда республикага импорт қилинаётган ўсимлик маҳсулотларини карантин текширувидан ўтказиш Вазирлар Маҳкамаси ҳузуридаги Ўсимликлар карантини давлат инспекцияси зиммасига юклатилган.
Изоҳ (0)