Бокуда 15 октябрь куни эрталаб Ўзбекистон Президенти Шавкат Мирзиёев ва Туркия президенти Ражаб Тоййиб Эрдўғоннинг учрашуви бўлиб ўтди.
Президент матбуот хизматининг хабарига кўра, давлат раҳбарлари бир-бирини самимий қутлаб, мамлакатлар ўртасидаги дўстлик, кўп қиррали ҳамкорлик ва стратегик шериклик муносабатлари мустаҳкамланиб бораётганини алоҳида мамнуният билан қайд этди.
Эрдўғон Шавкат Мирзиёевни Ўзбекистоннинг Туркий тиллий давлатлар ҳамкорлик кенгашига қўшилгани билан самимий табриклаб, бу қарор икки томонлама алоқалар ва минтақавий ҳамкорликни ривожлантиришда муҳим аҳамиятга эга эканини таъкидлаган.
Музокараларда конструктив сиёсий мулоқотни давом эттириш, иқтисодиёт, савдо, инвестициялар, энергетика, туризм ва бошқа йўналишларда амалий ҳамкорликни кенгайтириш масалалари муҳокама қилинган.
Учрашувда икки мамлакатнинг етакчи компаниялари иштирокидаги қўшма инвестиция лойиҳаларини қўллаб-қувватлаш муҳимлиги таъкидланган.
Хабарда айтилишича, президентлар халқаро сиёсат ва минтақавий ҳамкорликнинг долзарб масалалари юзасидан фикр алмашиб, бўлажак олий даражадаги тадбирлар режасини кўриб чиқди.
Изоҳ (0)