Қашқадарё вилоятидаги мавжуд 1710 та кўп қаватли уйнинг 40 таси авария ҳолатидаги уйлар ҳисобланади. Бу ҳақда Қарши шаҳрида Уй-жой коммунал хизмат кўрсатиш вазирлиги ва унинг вилоят бошқармаси мутасаддилари иштирокида бўлиб ўтган йиғилишда маълум қилинди, дея хабар беради «Дарё» мухбири Отабек Қўлдошев.
Тадбирда жорий йил 9 ойи давомида вилоятда коммунал соҳада амалга оширилган ишлар ҳамда муаммо ва камчиликлар хусусида сўз юритилди.
Тадбир аввалида сўз олган вазирлик вакили Эркин Набиев вилоятдаги кўп қаватли уйлар муаммоси ечимига бағишланган муҳим тадбирга вилоят уй-жой коммунал хизмат кўрсатиш бошқармаси бошлиғининг келмаганини танқид қилиб, унинг масъулиятсизлиги оқибатида бугун вилоятда уй-жой коммунал хизмат кўрсатиш соҳасида оқсоқликлар кузатилаётганини таъкидлади.
Маълум қилинишича, вилоятда айни кунда 2 та шаҳар ва 13 та туманда жойлашган 1710 та кўп қаватли уй бўлиб, уларга 155 та хусусий уй-жой мулкдорлари ширкати томонидан хизмат кўрсатилади.
—Вилоятдаги мавжуд кўп қаватли уйларнинг 41 таси авария ҳолатида эди, — дейди «Уйжойфондинспекцияси»нинг вилоят ҳудудий бўлими масъули Акром Худойназаров. — Шу кўп қаватли уйларнинг биттасига маблағ ажратилиб, таъмирлаш ишлари бошланди.
Қарши туман уй-жой коммунал хизмат кўрсатиш бўлими бошлиғи Собит Қосимовнинг таъкидлашича, туманда марказлашган канализация тизими ишламайди.
— Туманимизда марказлашган канализация тизими 2006 йилдан бери умуман ишламайди, — дейди Собит Қосимов. — Шу боисдан ҳам кўп қаватли уйлар қувурида чиқинди тўпланиб қолади ва узоқ вақтгача қолиб кетади. Бу эса ҳудудда бадбўй ҳид чиқишига сабаб бўлади. Қувурни тозалаш учун сектор раҳбарларига ялиниб, барча туманлардаги техникаларни жалб қиламиз ва тозалаймиз. Бу эса бизга катта моддий зарар келтиради.
Собит Қосимовнинг маълумот беришича, Қарши туманида айни кунда 100 га яқин кўп қаватли уйлар бор. Шундан рўйхатга олинганлари 66 тани ташкил этади. Сўнги 3 йил давомида қурилган янги 17 та кўп қаватли уйда ҳам марказлашган канализация тизими ишламайди.
«Дарё» мухбири вилоятдаги яна қайси туманларда марказлашган канализация тизими умуман ишламаслиги билан қизиқди. Берилган саволга вилоят уй-жой коммунал хизмат кўрсатиш бошқармаси бошлиғи ўринбосари Шерали Турсунов тайинли жавоб беришдан тийилди. Гапни айлантириб, аниқ маълумот келтирмади. Аммо хулосада бу борадаги аҳвол ачинарли эканини таъкидлади.
Изоҳ (0)