Bokuda 15-oktabr kuni ertalab O‘zbekiston Prezidenti Shavkat Mirziyoyev va Turkiya prezidenti Rajab Toyyib Erdo‘g‘onning uchrashuvi bo‘lib o‘tdi.
Prezident matbuot xizmatining xabariga ko‘ra, davlat rahbarlari bir-birini samimiy qutlab, mamlakatlar o‘rtasidagi do‘stlik, ko‘p qirrali hamkorlik va strategik sheriklik munosabatlari mustahkamlanib borayotganini alohida mamnuniyat bilan qayd etdi.
Erdo‘g‘on Shavkat Mirziyoyevni O‘zbekistonning Turkiy tilliy davlatlar hamkorlik kengashiga qo‘shilgani bilan samimiy tabriklab, bu qaror ikki tomonlama aloqalar va mintaqaviy hamkorlikni rivojlantirishda muhim ahamiyatga ega ekanini ta’kidlagan.
Muzokaralarda konstruktiv siyosiy muloqotni davom ettirish, iqtisodiyot, savdo, investitsiyalar, energetika, turizm va boshqa yo‘nalishlarda amaliy hamkorlikni kengaytirish masalalari muhokama qilingan.
Uchrashuvda ikki mamlakatning yetakchi kompaniyalari ishtirokidagi qo‘shma investitsiya loyihalarini qo‘llab-quvvatlash muhimligi ta’kidlangan.
Xabarda aytilishicha, prezidentlar xalqaro siyosat va mintaqaviy hamkorlikning dolzarb masalalari yuzasidan fikr almashib, bo‘lajak oliy darajadagi tadbirlar rejasini ko‘rib chiqdi.
Izoh (0)