Ўзбекистон аэродомларида тўққиз ой ичида авиация учун хавфли бўлган 1153 та об-ҳаво ҳодисалари кузатилгани маълум қилинди

«Ўзгидромет» 2019 йилнинг тўққиз ойи давомидаги фаолияти якунлари ҳақидаги маълумотни эълон қилди.

Қайд этилишича, тўққиз ой давомида «Ўзгидромет» иқтисодиёт тармоқларини гидрометеорологик маълумотлар ва прогнозлар билан таъминлаган. Марказнинг хизмат кўрсатиш, тезкор, таҳлилий, иқлимий маълумотларни вазирлик, идора ва бошқа тегишли корхона ва ташкилотларга етказиш ишлари 3 162,5 миллион сўмни ташкил этган.

«Қисқа ва ўрта муддатли тезкор агрометеорологик ва метеорологик маълумотлар ва прогнозларнинг оқланиши ва аниқлик даражаси 91—93 фоиз, гидрологик маълумотларда 90—92 фоиз, агрометеорологик маълумотларда 90 фоизни ташкил этди», — дейилади хабарда.

2019 йил 9 ой давомида жами 16 360 та самолёт-парвозлари об-ҳаво маълумотлари билан таъминланган бўлиб, шулардан 15 334 таси халқаро йўналишдаги парвозлар. Аэродром бўйича тузилган 9/24 соатлик башоратларнинг оқланиши 92,8 фоизни, қўниш учун берилган башоратларнинг оқланиши 97,8 фоизни, шторм огоҳлантиришларнинг оқланиши 96,8 фоизни ташкил этган.

Ўзбекистон аэродромлари ҳудудларида ҳаммаси бўлиб авиация учун хавфли бўлган 1153 та об-ҳаво ҳодисалари кузатилган бўлиб, огоҳлантирилиш 99,7 фоиз бўлган, шулардан 332 тасида кўринувчанлик 2 000 метрдан кам ва булутлилик 200 метрдан кам бўлганлиги кузатилган.

Қатновлардаги узилишлар, вақтинча тўхтатиб қўйилиши ва бекор қилинишига башоратларнинг оқланмаганлиги сабаб бўлмаган.

2019 йил 9 ой давомида Тошкент шаҳри бўйича 35 653 та, бутун тармоқ бўйича 100 339 та атмосфера ҳавоси намуналари олинган ва таҳлил қилинган. Юза сувлар ифлосланиши мониторинги лабораториясида 412 юза сув намуналари таҳлил қилинган.