O‘zbekiston aerodomlarida to‘qqiz oy ichida aviatsiya uchun xavfli bo‘lgan 1153 ta ob-havo hodisalari kuzatilgani ma’lum qilindi

“O‘zgidromet” 2019-yilning to‘qqiz oyi davomidagi faoliyati yakunlari haqidagi ma’lumotni e’lon qildi.

Qayd etilishicha, to‘qqiz oy davomida “O‘zgidromet” iqtisodiyot tarmoqlarini gidrometeorologik ma’lumotlar va prognozlar bilan ta’minlagan. Markazning xizmat ko‘rsatish, tezkor, tahliliy, iqlimiy ma’lumotlarni vazirlik, idora va boshqa tegishli korxona va tashkilotlarga yetkazish ishlari 3 162,5 million so‘mni tashkil etgan.

“Qisqa va o‘rta muddatli tezkor agrometeorologik va meteorologik ma’lumotlar va prognozlarning oqlanishi va aniqlik darajasi 91—93 foiz, gidrologik ma’lumotlarda 90—92 foiz, agrometeorologik ma’lumotlarda 90 foizni tashkil etdi”, — deyiladi xabarda.

2019-yil 9 oy davomida jami 16 360 ta samolyot-parvozlari ob-havo ma’lumotlari bilan ta’minlangan bo‘lib, shulardan 15 334 tasi xalqaro yo‘nalishdagi parvozlar. Aerodrom bo‘yicha tuzilgan 9/24 soatlik bashoratlarning oqlanishi 92,8 foizni, qo‘nish uchun berilgan bashoratlarning oqlanishi 97,8 foizni, shtorm ogohlantirishlarning oqlanishi 96,8 foizni tashkil etgan.

O‘zbekiston aerodromlari hududlarida hammasi bo‘lib aviatsiya uchun xavfli bo‘lgan 1153 ta ob-havo hodisalari kuzatilgan bo‘lib, ogohlantirilish 99,7 foiz bo‘lgan, shulardan 332 tasida ko‘rinuvchanlik 2 000 metrdan kam va bulutlilik 200 metrdan kam bo‘lganligi kuzatilgan.

Qatnovlardagi uzilishlar, vaqtincha to‘xtatib qo‘yilishi va bekor qilinishiga bashoratlarning oqlanmaganligi sabab bo‘lmagan.

2019-yil 9 oy davomida Toshkent shahri bo‘yicha 35 653 ta, butun tarmoq bo‘yicha 100 339 ta atmosfera havosi namunalari olingan va tahlil qilingan. Yuza suvlar ifloslanishi monitoringi laboratoriyasida 412 yuza suv namunalari tahlil qilingan.