18:00, 08.10.2019 45524

Чорсу қачон жонланади?

«Чорсу» ҳудудида мультифункционал сайёҳлик мавзеси яратиш таклиф лойиҳаси

Ҳар гал «Чорсу» бозорининг шимолида жамоат транспортидан тушиб жанубдаги асосий бекатга қараб бозорни кесиб ўтар эканман, ёшлигимдаги «Чорсу» билан ҳозирги «Чорсу» бозорини солиштиравераман. Бу бозор пойтахтнинг энг қадимий бозорларидан бири, «Ипак йўли»нинг бир бўғими бўлган. Авваллари жуда ҳам файзли, одамлар тўлиб тошган эди, ҳунармандлар расталари оралаб марказий майдондаги кўчма циркни томоша қилишга шошар эдик. Бу майдон ҳозирда худди «Йўл-йўл пойжома кийган болакай» фильмидаги концлагер ҳовлисига ўхшаб панжаралар билан ўраб қўйилган, ичи кимсасиз, ёввойи ўт ўланлар ўсиб кетган.

Шаҳарнинг ҳар томонидан келадиган автобуслар эса марказдаги автошохбекатга йиғилар эди, бугун бу жойнинг бир томони автотураргоҳ, иккинчи қисми эса вақтинчалик улгуржи бозор. Жамоат транспортлари бозорнинг турли бурчакларига сочилиб кетган.

Қизил рангдаги нуқталар — рухсат этилган ва рухсат этилмаган автошохбекатлар.

Сариқ рангдаги нуқталар — аввалги автошоҳбекат (ҳозир эса улгуржи бозор).

Жамоат ва шахсий автотранспортлар ҳаракати ва тураргоҳларни нотўғри ташкиллаштирилиши, бозорнинг қайноқ нуқталарини ўраб кимсасиз ҳудуд қилиб қўйилиши, савдогарларни у жойдан бу жойга кўчириб сарсон қилиниши ва мана шундай бетартиб, пуҳта ўйланмаган режасиз ўзгартириш киритилшлар бозор инфраструктурасини бузиб юборган. Бозорда ҳаридорлар учун ҳам ноқулайлик юзага келиши оқибатида савдогарларнинг савдоси тушиб кетган...

Ушбу ҳудуд юзасидан бирор таклиф билдиришдан аввал ўз позициямизни ошкор қилиб қўйишни маъқул кўрдик. Бугунги улкан ислоҳотлар даврида юртимизни фаровонлиги ва инсон манфаати асосий масалалар этиб белгиланган бир пайтда « ‘Чорсу’ ҳудудида мультифункционал сайёҳлик мавзеси» масаласи муҳим муаммо деган иддаодан йироқмиз, шу билан бирга бу ерда тирикчилик қилиб рўзғор юритаётганлар ва Гулсарой маҳалласида яшаётган инсонлар бозорнинг «эҳтимолли» реконструкциясидан жабр кўришини истамаймиз! Бозорнинг реконструкцияси ҳақиқий маънода ҳар томонлама манфаатли ва шаффоф бўлиши тарафдоримиз. Ушбу лойиҳани яратишга ҳеч кимдан буюртма олмаганмиз, ҳеч кимнинг манфаатини кўзламаганмиз. Шунчаки қачондир мозаиканинг ҳар бир бўлаги умумий манзарани тасаввур қилган ҳолда еғилса, ниҳояси гўзал бир манзил бўлиб бица биз ўз мақсадимизга етган бўламиз!

Лойиҳа бўлими

Ҳудуд мураккаб релефли бўлиб, энг баланд ва энг паст нуқталари ораси 10 метрдан ошади. Ҳудудда маданий мерос бинолари ва меъморий аҳамиятга эга (ўз наздимизда) биноларни сақлаб қолган ҳолда бош тархни иккита асосий сайлгоҳ (Хадра йўли, ҳамда Қодирий сайлгоҳи) ва бешта кўча билан ажралиб турувчи 8 та лотларга бўлинган ҳолда лойиҳаладик.

Сайлгоҳ ва кўчаларни марказда саккиз бурчакли платформа бирлаштириб туради. Икки бурчагида метроларга кириши бўлган платформа 2-қаватда жойлашган ва 2-сатх баландлигидаги майдонда ҳаракатланиш қулайлигини беради.

Транспорт бўлими.

Ҳудуднинг мураккаб релефлигидан фойдаланиб, уни шартли икки сатхда (юқори ва пастки) лойиҳаладик. Пастки сатхда автотураргоҳ ва омборхоналар жойлашади. Пастки сатхдаги Қодирий боғи ва Жар спорт комплексини боғловчи сайлгоҳда шимолий ва жанубий йўналишдаги жамоат транспортлари учун алоҳида автостанция, ҳамда метронинг биринчи қавати яхлит транспорт бўғимини ташкил этади.

«Чорсу» бозори фақатгина бозор эмас, у траспорт узели ҳамдир. Харитага қарасангиз радиал халқасимон шаҳар эски шаҳар қисмининг марказий нуқтасида жойлашган.

Сағбон-Фаробий кўчалари чорраҳалари Сақичмон-Зарқайнар-Фаробий кўчалари чорраҳасига бирлаштириб юборилади. Зарқайнар кўчасидан А. Навоий кўчасига чиқиш қайтадан ташкил этилади. Навоий-Беруний-Самарқанд дарвоза кўчалари чорраҳасида ва Беруний-Ботир Зокиров-Сақичмон чорраҳаларида ер ости йўллари ташкил этилади. Бу эса худуддаги тирбандликни камайтириб тўхтовсиз ҳаракатни таъминлайди. Ҳар бир чорраҳада пиёдалар ўтиш йўллари ташкиллаштирилади.

Жамоат ҳудудлари

Хадра майдонидан катта мовий гумбазгача кенг сайилгоҳ бўлиб маркази кўкаламзор, икки чеккасида турли хил брендлар савдо дўконлари ва кафе-ресторанлар жойлашади.

Қодирий сайлгоҳи Абдулла Қодирий боғидан келувчи асосий йўлакни Жар спорт комплексининг марказий майдонига улайди. Унда автостанциялар, метро, туристик автотураргоҳлар ҳамда турли рекреацион ҳудудлар бўлади. Сайлгоҳнинг марказий қисмида катта фаввора ҳудудни салқинлаштириб туради.

«Чорсу»нинг барча 4 томонлама чорраҳаларида пиёдалар кўприклари, Кўкалдош мадрасаси олдидаги чорраҳа устига кенг пиёдалар платформаси лойиҳалаштирилди.

Дунёнинг барча серсайёҳ шаҳарлари албатта ўзининг «шоппинг» марказлари, пиёда кўчалари билан ҳам машҳур. Биз ҳам «Чорсу» мажмуасини фақат сайёҳлар учун эмас, балки ҳамма учун савдо ва кўнгилочар ҳудуд сифатида қайта жонланиб, файзга тўлишини тилаб қоламиз!