Toshkent yo‘lovchi vagonlarini ta’mirlash va ularga xizmat ko‘rsatish zavodi yo‘lovchilarni tashishga mo‘ljallangan yangi vagonlar partiyasini tayyorladi, deb xabar beradi “O‘zbekiston temir yo‘llari” matbuot xizmati.
Shartnomaga ko‘ra, joriy yilning oxiriga qadar jami 55 ta yo‘lovchi vagonlari tayyorlanib, topshirilishi lozim. 2025-yilgacha esa 300 ta yangi vagonlarni ekspluatatsiya qilish rejalashtirmoqda. Bu orqali O‘zbekiston yo‘lovchi temiryo‘l sostavining 70—80 foizi yangilanadi.
“O‘ztemiryo‘lyo‘lovchi” vagonlarini yangilash konsepsiyasiga asosan, yiliga turli tipdagi kamida 50 ta yangi vagon tayyorlab yetkaziladi. Vaholanki, 2009—2018-yillar davomida yiliga o‘rtacha 18 ta yangi vagon tarkibga qo‘shib kelingan.
“Umuman olganda, har yili o‘zimizda ishlab chiqarilgan bunday ko‘p sonli vagonlarni qabul qilib olish – bu katta natija. Yo‘lovchi temiryo‘l transporti xo‘jaligini rivojlantirish va temiryo‘l transportida yo‘lovchilar tashuvi hajmini oshirish uchun mavjud barcha imkoniyatlarni ishga solamiz”, – deydi “O‘ztemiryo‘lyo‘lovchi” AJning marketing va innovatsiyalarni joriy etish bo‘yicha direktori Sunnatullo Hamidov.
Ta’kidlash kerakki, yangi vagonlar zamonaviy oynalar, svetodiod chiroqlar, issiq va sovuq suv tizimi, yong‘inga qarshi signalizatsiya bilan jihozlangan.
Izoh (0)