Green Card мавсуми бошланди. Қанча одам «сурмоқчи»? Буни аниқлашга ҳаракат қилдик

Green Card мавсуми бошланиши муносабати билан «Дарё» мухбири Дилбар Исматуллаева Telegram мессенжерининг аҳолининг нисбатан «жиддий», зиёли қатламини қамраб олган каналларида турли шаклда сўровномалар ташкил этди. Сўровнома ўтказишда яқиндан ёрдам берган канал админларига раҳмат деган ҳолда натижаларни эълон қиламиз.

Натижалар 4 октябрга оид.

Ўзбекистон талабаларини энг кенг тарзда қамраб олган ва расмий фаолият олиб борувчи @TalabaUz  каналида ўтказилган сўровнома натижалари қуйидагича:

Кўриб турганингиздек, сўровномада иштирок этган талабаларнинг 33 фоизи қатъий «суриш» фикрига келган бўлса, яна 28 фоизи яқиндагина хаёлан америкаликка айланган. Қолган 32 фоиз ватанпарвар дўстларимизни олқишлаймиз. 8 фоиз «Green Card? Нима у?» жавоб вариантини белгилаганларга эса «уят-уят» дея оламиз холос. Шу ўринда бир ҳазиломуз савол туғилади: талабалар кетса, маклерларни ким боқади?

Навбатдаги сўровнома бадиий адабиёт ишқибозларининг кўпчилиги аъзо бўлган «Иқтибос» каналида ўтказилди. Натижалар билан танишинг:

Китобсеварларнинг 29 фоизи зудлик билан кетиш тараддудида бўлса, қолган 20 фоизи кетолмаслигидан афсусда. Бу жаноблар китоб ва ҳаёт бошқа-бошқа масалалигини унутган кўринишади.

Шу ўринда сўровномаларга ҳукм сифатида қарамаслигингизни сўраймиз. Бу шунчаки эксперимент ва унинг натижаларидан хулоса қилишда ҳар ким ўз дунёқарашидан келиб чиқади.

Кўпчилигимиз яхши танийдиган @NurbekAlimov’дан ҳам ўз Telegram-каналида сўровнома ташкиллаштириб беришини илтимос қилдик. Натижалар қуйидагича:

39 фоиз одам Green Card ўйнаш ниятида. Буни қандай тушуниш мумкин? Ҳа, топдингиз, бу қип-қизил ношукурлик!

Ҳазил ўз йўлига, лекин сўровнома мақсадли равишда аҳолининг (нисбатан) ўқимишли қисми йиғилган каналларда ўтказилди. Ҳар бир каналдаги 30–40 фоиз фойдаланувчи самолёт чиптасини қўлига тутқазгудек бўлсангиз, эртагаёқ жўнаб кетиш кайфиятида.

Учта сўровномадан хулоса қиладиган аҳмоқ йўқ дейдиганлар учун навбатдаги сўровномалар натижаларини бирин-кетин ҳавола қиламиз:

Бу бола исми миянгизга автоматик тарзда келган Ғаниев эмас. У ижтимоий тармоқларда «Доктор Шизоид» номи билан машҳур ва доимий равишда ўзининг тиббиётга алоқадор қизиқарли ва фойдали мақолаларини эълон қилиб боради. «Дарё»да ҳам унинг бир нечта мақолалари эълон қилинган (1, 2).

Сарварнинг каналида ўтказилган сўровнома натижаларига кўра, 33 фоиз аъзо «сурмоқчи», яна 8 фоизи эса ватанпарварлигини тан олган.

Лингвистикага қизиқувчилар учун махсус энциклопедия дея бемалол эътироф этиш мумкин бўлган «Асанов формати» ўқувчиларининг 32 фоизи кетишга орзуманд. Яна 14 фоиз одам бетараф позицияни ушлаб турибди.

«Муҳримчилар» ҳам пешқадамликни қўлдан беришмаяпти. 37 фоиз канал аъзолари Green Card ўйнаш истагини билдирган. Яна 12 фоизлик жамоа «ўйлаб кўряпти».

Ўзининг ажабтовур мемлари билан анчагина назарга тушиб қолган «Нурқул минбари» каналини ҳам ашаддий ношукрлар макони дейиш мумкин экан. Нега дейсизми? Мана, қаранг:

Натижаларга эътибор қаратганимизда шу кўринадики, иштирокчиларнинг 40 фоизга яқинида Америкага кетиш учун мойиллик бор. Албатта, бу сўровимиз бутун Ўзбекистондаги кайфиятни акс эттира олмайди: биринчидан, Ўзбекистонда бир неча минг эмас, ўн миллионлаб одам яшайди; иккинчидан, ҳамма ҳам ижтимоий тармоқларда ўтирмайди, юқоридаги каналларнинг эса ўзига хос аудиторияси бор. Нима бўлганда ҳам, сўровнома ўтказган каналларни ўқийдиган қатламнинг интеллектуал ва ижтимоий даражасини ҳисобга оладиган бўлсак, бу кўрсаткичдан бир қанча хулосалар қилиб олсак бўлади. Бундай хулосалар қилишни эса ҳар кимнинг ўзига қолдирамиз.

Муаллиф фикри таҳририят нуқтаи назаридан фарқ қилиши мумкин.