Ўзбекистон Республикаси Фанлар академияси Ботаника институти олимлари сўнгги дала тадқиқотлари давомида Ўзбекистон флораси учун янги ўсимлик турларини топди. Бу ҳақда ЎзР ФА матбуот хизмати маълум қилди.
Топилган турлардан бири – Талос тангаўти (Hedysarum talassicum Nikitina & Sultanova) Бурчоқдошлар (Fabaceae) оиласига тегишли бўлиб, биринчи марта Э.Никитин ва Б.Султонова (Қирғизистон) томонидан 1954 йил Талас Олатоғидан топилган.
Ҳозирги вақтда ушбу ўсимлик турининг гербарий намунаси Қирғизистон Миллий Фанлар академиясининг Биология институти гербарийида сақланмоқда. Шу кунгача мазкур тур Қирғизистон флораси учун эндемик ҳисобланиб келган, чунки 65 йилдан бери Ўзбекистонда ушбу тур мавжудлиги тўғрисида бирон-бир далил йўқ эди.
Ўзбекистон ҳудудидан бу ўсимлик Ойгаинг дарёси (Ғарбий Тян-Шан) водийсида, Баркраксойнинг юқори оқимида, денгиз сатҳидан 3100—3200 метр баландликда топилган.
Қайд этилишича, Талос тангаўти интенсив равишда чорва молларини боқиш зонасида ўсади, бу табиий популяцияларни сақлашнинг чекловчи омилларидан биридир. Тадқиқот ўтказилган ҳудудда 100 тадан кам ўсимлик туплари топилди, бу эса «Ўзбекистон Қизил китоби»нинг кейинги нашрига киритиш учун асосдир.
Бундан ташқари, ушбу экспедиция давомида Тангаўт туркумининг бошқа бир тури — Писком тангаўти (Hedysarum pskemense Popov ex B. Fedtsch) топилган. Ушбу турнинг Ўзбекистон ҳудудидан терилган сўнгги гербарий намунаси 1925 йилга тўғри келади. Турларнинг популяциялари Тундуксой водийсидан топилган, бу ерда турларнинг кўп сонли аҳолиси ўсади.
Изоҳ (0)