Испания ҳукумати Британия туроператори Thomas Cook’нинг ёпилиши сабаб юзага келган иқтисодий зарарларни қоплаш учун фармон билан тасдиқланган режа асосида чора-тадбирларни амалга оширади. Ишлаб чиқиладиган режа 13 банддан иборат бўлади ва унинг ижросига 300 миллион евро атрофидаги маблағ ажратилади. Ҳукуматнинг бу борадаги фармони келаси ҳафта 11 октябрда имзоланиши ва эълон қилиниши мумкин. Бу ҳақда «Коммерсантъ» хабар берди.
Ушбу чора-тадбирлар Испания саноат, савдо ва туризм вазири вазифасини бажарувчи Рейес Марото раҳбарлигида ишлаб чиқилган.
Чора-тадбирларда рейслар сонининг қисқариши ҳақида авиахабарлар юборишни рағбатлантириш, жумладан, йўловчиларга ер усти хизматларини кўрсатиш ва 46 та испан аэропортини бошқарувчи AENA компанияси фуқароларни қиш мавсуми учун қўшимча тўловлардан озод қилиш, 1 январдан бошлаб билетлар тарифлари учун нархлар 12 фоизга арзонлаштириши, 200 миллион евро миқдоридаги маблағни индивидуал тадбиркорлар ва компанияларни ликвидация қилиш муаммоларини ҳал этишга сарфлаш, шунингдек, туристлар саёҳатларини амалга оширувчи компанияларнинг солиқлар ва бошқа тўловларни кечроқ амалга оширишига рухсат этиш ҳамда туристик талабни реклама кампаниялари воситасида тиклаш кўзда тутилган.
Ҳукуматнинг ушбу юридик стратегияси Thomas Cook банкротлиги сабаб юзага келган оғир иқтисодий вазиятни енгиллаштириши кутилмоқда.
Эслатиб ўтамиз, Британиянинг энг машҳур ва 178 йилдан бери фаолият юритиб келаётган туроператорларидан бири Thomas Cook 23 сентябрда тугатилганлигини эълон қилган. Натижада бутун дунё бўйлаб саёҳат қилишни истаган 600 минг сайёҳнинг дам олиш учун билет брон қилиши бекор бўлганди.
Изоҳ (0)