Тожикистоннинг Турсунзода туманида 3 октябрь куни мамлакатда ва минтақдаги таниқли узум етиштирувчи деҳқон Камол ҳожи ота Мадумаров 80 ёшида вафот этди. Тожикистон президенти Эмомали Раҳмон деҳқоннинг ўлими муносабати билан унинг қариндошлари ва яқинларига таъзия изҳор қилди. Бу ҳақда Тожикистон республикаси президентининг расмий сайти хабар берган.
«Камол Мадумаров самарали меҳнат фаолияти давомида мамлакат қишлоқ хўжалигининг ривожланишига муносиб ҳисса қўшган, у айниқса боғдорчилик ва узумчилик йўналишида бор тажрибаси ҳамда билимини ватан равнақи учун сафарбар этган инсон эди», — дейилади хабарда.
Турсунзода туманидаги ака-ука фермерлар Камол ҳожи ҳамда Неъмат ҳожи Мадумаровлар бўш ётган ерда 600 гектар майдонда узумзорлар барпо қилиб, «Боғи сомон» номли боғда 10 дан ортиқ узум навларини етиштирган ва Тожикистоннинг энг таниқли инсонлари қаторида қайд этилади.
Давлат раҳбари Эмомали Раҳмон бир неча бор ушбу деҳқон хўжалигида кўп бора меҳмон бўлган ва у ерга Ўзбекистон Республикаси президенти Шавкат Мирзиёев ҳамда Беларусь президенти Александр Лукашенко билан ҳам ташриф буюрган.
Шавкат Мирзиёев 2018 йилда деҳқон хўжалигига ташрифи чоғида асли олтиариқлик уста деҳқон фарзанди Камол ҳожи Мадумаровга Captiva автомобилини совға қилганди.
Изоҳ (0)