AQSh rasmiylari Rossiya Malta Satabank’idan maxfiy to‘lovlar o‘tkazish uchun foydalanganini taxmin qilmoqda. To‘lovlar Liviya, Italiya va Malta hududidagi neft kontrabandachilari Darren va Gordon Debonoga borib taqaladi. Bu haqda Meduza xabar bermoqda.
Darren Debononing nomi Malta yangi tarixidagi eng shov-shuvli qotillik — ikki yil avval jurnalist Dafna Galitsiyaning avtomobili portlatilishi bilan bilan bog‘liq holda tilga olinmoqda. Galitsiya o‘limidan avval Maltadagi idoralar, liviyalik savdogarlar va Sitsiliya mafiyasining neft kontrabandasiga aloqadorligi to‘g‘risidagi ma’lumotlarni to‘playotgandi.
2017-yil oktabrida Italiya politsiyasi Malta terma jamoasining sobiq futbolchisi Darren Debono va uning uch nafar sherigini yoqilg‘i noqonuniy aylanmasida ayblab, qamoqqa olgandi. Oradan biroz vaqt o‘tib Debononi garovga qo‘yib yuborishdi, 2018-yil noyabrida esa vataniga qaytishga ruxsat berildi. Hozirda u Maltaning “Senglea Atletik” futbol klubi rahbarlaridan biri sanaladi.
2019-yil iyulida BMT Xavfsizlik Kengashi yig‘ilishida Malta Darren va Gordon Debononi tashkilot sanksiyalari ostidagi shaxslar ro‘yxatiga kiritishni taklif qildi, biroq Rossiya ularning tarafini olib, qarorga veto qo‘ydi.
Debononing guruhi Malta sharqidagi ushbu davlat hududiy suvlariga kirmaydigan Hurd’s Bank nomli sayozlik orqali noqonuniy neft tashiydi. Rossiya ham aynan shu hudud orqali AQSh sanksiyalar qo‘llagan Venesuelaga yengil neft (bu Venesuelaning og‘ir tarkibli neftiga aralashtirish uchun kerak) yetkazib berishi gumon qilinadi.
Izoh (0)