Россия Федерал хавфсизлик хизматининг АКТ соҳасидаги жиноятларга қарши курашиш бошқармасининг банк бўлими собиқ раҳбари Кирилл Черкалин Москвадаги ФХХ биноси яқинида пора олганлиги аниқланди. Бу ҳақда «Коммерсантъ» хабар бермоқда.
Нашрнинг маълумотларига кўра, Черкалин «Транспортний» банкининг собиқ эгаси Александр Мазановдан пора олган. Уларнинг ўртасида воситачилик вазифасини ФХХ полковниги Михаил Горбатов ва «Европеское Подмоскове» компаниясининг таъсисчиси ва Мазановнинг маслаҳатчси бўлган Арно Хожоян бажарган.
Таъкидланишича, Горбатов Черкалинни банки учун «паноҳ» сифатида 2013 йилда таклиф қилган. Черкалин ҳар ойда Мазановдан унинг банкига «паноҳ» бўлгани учун 50 минг доллардан олган. Мазанов эса дастлаб полковникка аниқ ишлар учун пул тўлашни хоҳлаган. Бироқ банкка ҳақиқатан ҳам ёрдам керак бўлганда, полковник мукофот пули талаб қилган.
Натижада Черкалин 2015 йилнинг февраль ойигача ҳар ойда пора олиб турган. Банк эгаси унга жами 750 минг доллар тўлаган. Қайд этилишича, Горбатов ҳам бу суммадан ўз улушига эга бўлган. У пулларни Хожояндан олган ва уларни Черкалинга олиб бориб берган. Кўпинча пуллар кўчада ёки ФХХ биноси яқинидаги кафеда олинган.
Полковниклар Кирилл Черкалин, Дмитрий Фролов, шунингдек, уларнинг ҳамкасби Андрей Василев жорий йилнинг апрель ойида қўлга олинган. Черкалин бир неча миллион рубл пора олганликда, Фролов ва Василев эса йирик миқдорда фирибгарлик қилганликда айбланмоқда. Тинтув вақтида уларнинг уйларида нақд кўринишдаги рубл, доллар ва евролар топилган. Тинтув вақтида топилган пулларнинг умумий миқдори 12 миллиард рублни (тахминан 186 миллион доллар) ташкил қилган. Хабар берилишича, тўпланган пулларни полковниклар мамлакатдан ташқарига олиб чиқиб кетишни режалаштирган бўлиши мумкин.
Давлат хавфсизлик қўмитасининг собиқ ходими ва бизнесмен Александр Лебедевнинг айтишича, полковниклар бир неча йил давомида пулларни ўзлаштириш билан шуғулланган банкирларни ҳимоя қилган ва ўз ишлари учун маълум миқдорда улуш олган. Полковникларнинг уйидан топилган 12 миллиард рубл «чўнтак пули» эканлиги айтилмоқда.
Аввалроқ полковник Черкалиннинг уйида ўтказилган тинтув ҳамда пулга тўла сумкалар ва қутилар акс этган видео тарқалгани ҳақида хабар берилган эди.
Изоҳ (0)