24 август куни Тошкентнинг Mont Blanc хусусий пластик жарроҳлик клиникасида операция қилинган 20 яшар самарқандлик ҳомиладор Гулшан Шарифова вафот этди. Гулшан Mont Blanc шифокорлари хатоси билан беш кун ичида нобуд бўлган иккинчи мижоздир, деб хабар беради Fergana News.
Ушбу клиника фаолиятидан хабардор мутахассислар Mont Blanc клиникасидаги ўлимлар юзасидан ҳеч ким жавобгарликка тортилмаган, иш ёпти-ёпти қилиб юборилган демоқда. Клиника ўлимлар ортидан ўз номини ўзгартирган.
Гулшан Шарифовани операция қилган врач Ф.О. айбни анестезиологга тўнкаган ва «юзлаб қилинаётган тиббий жарроҳлик амалиётлари давомида организми кучсиз бўлган 1—2 бундай мижозлар ўлими одатий ҳолатдир» деди.
2019 йилнинг 24 августида Тошкентнинг Бунёдкор шоҳ кўчасида жойлашган Mont Blanc хусусий пластик жарролик шифохонасига самарқандлик 20 яшар Гулшан Шарифова мурожаат қилади: Гулшаннинг бурнида чиққан майда ўсимта унинг нафас олишига халақит бериб келган.
Гулшан Шарифованинг отаси Умид Абдушукуровга кўра, кўринишидан оддий бўлган ва бошқа клиникаларда 500 минг сўм турадиган бу жарроҳлик амалиётига у 8 миллион сўм пул берган:
«Дўхтир 14 августда кўриб, ‘Бўлди, 20 минутлик операция. Шундоқ операция қиламиз — уйингизга олиб кетаверасиз!’, деди. 24 август куни операцияга олиб киришдан олдин дўхтирига ҳам, анестезиологига ҳам айтдим — ‘Фақат текшириб олинглар — аллергияси бор!’, десам ‘Биз ишимизни биламиз, хавотир олманг, пулини тўланг’, дейишди. 20 минут ўтмасдан ‘Қизингиз комага тушиб қолди!’, деб айтишди».
Гулшан Шарифовани комадан чиқаришга 2 соат уринган врачлар, уни Akfa MedLine шифохонасига жўнатади. Аммо у ерда ҳам шифокорлар аёлни ўзига келтира олмади.
Умид Абдушукуровнинг айтишича, қизи ўлимидан бир неча кун олдин бу клиникада худди шу шифокорлар қўлида яна бир аёл нобуд бўлган:
«Уч кун комада ётган қизим ўша ерда тамом бўлди. Биз текшириб кўрсак, 19 август куни худди шунақа операция пайтида 42 яшар аёлни ўлдиришган экан. Прокуратура келди, жиноят иши очамиз, деди, фақат ‘Иш очилса ўлик шу ерда қолади, уни ёриб текширамиз!’, дейишгандан кейин Самарқандга олиб бориб кўмдик», — дейди марҳуманинг отаси.
Жасаднинг экпертизага қолдирилишига кўнмаган яқинлари шифокорларга эътирози йўқлиги тўғрисида ҳужжатларга қўл қўйиб берган ва ўлим муносабати бошланган терговгача суриштирув иши тўхтатилган.
Самарқандлик Гулшан ва қозоғистонлик Лилияни жарроҳлик амалиётидан ўтказган жарроҳ Фахриддин Облоқулов нашр саволларига қуйидагича жавоб берган:
«Ҳа, Шарифова менинг мижозим бўлган, фақат операция бўлмасдан, наркоз бериш пайтида нимадир бўлди-ю, операция қилинмасдан, Akfa MedLine’га олиб бордик. ‘Тез ёрдам’ машинасида. Тахминларимизга кўра, ё доридан реакция бериб ‘анафилактик шок’ ёки юрак тизимидаги фибрилляция, яъни қалтираб қолиши оқибатида нобуд бўлди. Бу саволларнинг ҳаммасини анестезиологга бериб кўриш керак».
Шифокор Лилияни ҳам операция қилганини, у ҳам ўлганини тан олди.
Фахриддин Облоқуловнинг айтишича, «юзлаб қилинаётган тиббий жарроҳлик амалиётлари давомида организми кучсиз бўлган 1—2 бундай мижозлар ўлими одатий ҳолатдир».
Шифокор Гулшаннинг отасидан олинган пуллар қайтариб берилгани, аммо бошқа ҳеч қандай компенсация берилмаганини маълум қилди.
Марҳумалар Гулшан Шарифова ва Лилия Апостоловани анестезияси билан шуғулланган врач-анестезиолог Ў.Х.га ҳам айни саволлар билан мурожаат қилиб, ундан жавоб ололмади.
Монт Бланc хусусий пластик хирургияси клиникаси расмий сайтида кўрсатилган телефон рақамлари орқали уланишнинг иложи бўлмади.
Шифокор Фахриддин Облоқуловнинг маълум қилишича, бу ҳодиса ортидан унга ва врач-анестезиолог Ўлмас Холбековга хайфсан эълон қилиниб, улар клиникадан ишдан бўшатиб юборилган.
Хабарда қайд этилишича, тиббиёт фанлари номзоди, олий тоифали врач Гулбаҳор Нуриддинова Mont Blanc клиникасида бир муддат ишлаб, клиника талабга жавоб бермаслиги учун ишдан бўшаб кетган ва ўшандан бери мазкур муассаса фаолиятини тақиқлашни талаб қилиб келади.
Гулбаҳор Нуриддинованинг иддао қилишича, ҳозирда «Мукаммаллик» (илгари Mont Blanc) номи билан танилган пластик жарроҳлик клиникаси раҳбарияти зарурий тиббий маълумоти йўқ шифокорларсиз ва зарурий тиббиёт ускуналарисиз мижозлар ҳаётини хавф остида қолдириб операциялар ўтказмоқда, шунинг учун ҳам бир ойнинг ичида икки бемор ҳалок бўлди.
Гулбаҳор Нуриддинованинг фикрича, Гулшан Шарифова ва Лилия Апостоловани клиника шифокорлари олдиндан реакцияга текширтирмасдан, нормал тиббий муолажа бермасдан наркоз ҳолатига киритишга уринган.
У бу ҳолатларнинг олдини олиш мумкинлиги, аёллар шифокорлар хатосидан вафот этганини таъкидлаган:
«Негадир прокуратура иккала ўлим юзасидан текширув ўтказмади, ҳеч ким жавобгарликка тортилмади. Шарифова бурнига укол қилинганидан кейин комага тушган, Апостолованинг ҳам дорига бўлган реакциясини ҳисобга олмасдан комага тушириб қўйишган. Иккала ҳолатда ҳам битта жарроҳ ва битта анестезиолог бўлган. Клиника раҳбарлари хатти-ҳаракатлари туфайли мен август ойининг ўзида уч киши ўлган деяпман — кейинроқ Гулшан Шарифова ҳомиладор экани аниқланган. Буни ота-онаси ҳам билмаган».
Гулбаҳор Нуриддинова пластик жарроҳлик амалиёти вақтида ўлган иккала аёлнинг жасади Ўзбекистон қонун-қоидаларига хилоф равишда суд-тиббий экспертизасиз яқинларига дафн этишга бериб юборилганидан афсусланди, дейилади хабарда.
Мутахассислар ҳисоб-китобига кўра, сўнгги ўн йил ичида Ўзбекистонда ўтказилаётган пластик жарроҳликлар сони уч бараварга ошган. Тошкентда ўнга яқин ихтисослаштирилган пластик жарроҳлик клиникалари бор, шунингдек, бундай тиббий марказлар Самарқанд, Бухоро ва Фарғона вилояти шаҳарларида ҳам фаолият юритади. Мижозлар ичида талаб юқори бўлган пластик жарроҳлик турлари — кўз қовоқлари, бурун шаклини ўзгартириш ҳамда кўкракни катталаштириш ҳисобланади.
Изоҳ (0)