Қашқадарёда лицензиясиз ҳайдовчилардан 2 млрд сўмдан ортиқ жарима ундирилди

Қашқадарёда 2019 йилнинг ўтган даври мобайнида лицензиясиз фаолият юритган 1652 нафар ҳайдовчидан 2 миллиард 185 миллион сўм жарима ундирилди. Бу ҳақда «Дарё»га Қашқадарё вилоят транспорт бошқармаси маълум қилмоқда.

Маълум бўлишича, жорий йилнинг ўтган даври мобайнида вилоят транспорт бошқармаси ҳамда Йўл ҳаракати хавфсизлиги бошқармаси ҳамкорлигида 1173 маротаба рейд ўтказилган.

Мазкур рейдлар давомида 3201 та маъмурий баённома расмийлаштирилган бўлиб, 283 та ҳуқуқбузарлик лицензиясиз юк ташувчилар ҳиссасига тўғри келган. 2918 та ҳолатда эса ҳайдовчилар лицензиясиз йўловчи ташиётгани маълум бўлган.

Вилоят транспорт бошқармасининг маълумот беришича, 1652 нафар ҳуқуқбузарга 2 миллиард 185 миллион жарима жазоси қўлланилган бўлса, 1549 нафар ҳайдовчи лицензия олгани боис жаримадан озод этилиб, огоҳлантирилган.

1549 нафар лицензия олувчилар ҳисобидан давлат бюджетига 798 миллион 400 минг сўм маблағ тушган.

Маълумот учун, айни вақтда вилоятда 4971 та автомобиль фаолияти қонунийлаштирилиб, лицензия олган бўлса, шундан 3478 та енгил автомобиль такси хизматини ўтайди. 3478 та таксининг 1674 таси Қарши шаҳрида фаолият кўрсатади.