Ўзбекистон ташқи қарзи 2019 йил бошидан бери 20 фоизга ёки 3,4 миллиард долларга ошган ҳолда, 2019 йил 1 июль ҳолатига 20,7 миллиард долларни ташкил қилди. Бу маълумот Марказий банк эълон қилган 2019 йил биринчи ярим йиллиги учун Ўзбекистоннинг тўлов баланси, халқаро инвестицион позицияси ва ташқи қарзи тўғрисидаги таҳлилда келтирилган.
Умумий ташқи қарз ўсишининг 3,088 миллиард доллари ёки 64 фоизи давлат ташқи қарзи (13,174 миллиард доллар) ҳисобланади. Бу қарзнинг 1,018 миллиард доллари Ўзбекистон халқаро облигациялар ҳисобига шаклланган. Шунингдек, 330,3 миллион доллар ёки 36 фоиз ўсиш хусусий сектор ташқи қарзига (7,538 миллиард доллар) тўғри келади.
Секторларнинг хусусий ташқи қарздаги улушлари:
- Нефть-газ ва энергетика сектори — 5,167 миллиард доллар (-219,2 миллион доллар);
- Банк сектори — 1,398 миллиард доллар (+419,8 миллион доллар);
- Телекоммуникация сектори — 246,7 миллиард доллар (-1,5 миллион доллар);
- Тўқимачилик сектори — 139,4 миллион доллар (+7,2 миллион доллар);
- Бошқа секторлар — 587,4 миллион доллар (+124 миллион доллар).
Хусусий ташқи қарз тўловлари асосий қарз бўйича 706,6 миллион доллар ва фоиз тўловлари бўйича 182,8 миллион долларни ташкил қилди. Бунда, асосий қарз ва фоизлар бўйича тўловларнинг энг катта қисмини ҳанузгача нефть-газ ва энергетика сектори корхоналари ҳамда банклар амалга оширмоқда.
Жами ташқи қарзларнинг 17,050 миллиард доллари ёки 82,3 фоизи 10 йилдан ортиқ муддатга жалб қилинган қарзлардир.
Изоҳ (0)