19 сентябрь, пайшанба куни Халқ депутатлари Бойсун тумани Кенгашининг навбатдан ташқари сессияси бўлиб ўтди. Унда вилоят ҳокими Тўра Боболов, туман Кенгаши депутатлари, вилоят ва туман ҳокимликлари вакиллари, корхона ва ташкилотлари раҳбарлари, шунингдек, Президентнинг давлат хизмати ва ҳокимият вакиллик органлари билан ҳамкорлик қилиш масалалари бўйича маслаҳатчиси Шерзод Қудбиев иштирок этди. Бу ҳақда «Дарё»га Сурхондарё ҳокимлиги ахборот хизмати раҳбари Заҳириддин Тўраев маълум қилди.
Сессияда Ўктам Тўраев бошқа ишга ўтганлиги муносабати билан Бойсун тумани ҳокими вазифасидан озод қилиниб, шу кунгача Сариосиё тумани ҳокими лавозимида ишлаб келган Асқарали Жўраев Бойсун тумани ҳокими этиб тасдиқланди.
Асқарали Жўраев 1972 йилнинг 17 мартида Денов туманида туғилган. 1994 йилда Наманган саноат-технология институти, 2002 йилда Тошкент давлат юридик институтини тамомлаган. 2016 йилда Сариосиё тумани ҳокими этиб тайинланган. Унга қадар эса Сурхондарё вилояти ички ишлар бошқармаси ҳамда вилоят прокуратураси органларида турли лавозимларда фаолият юритган.
Шунингдек, 19 сентябрь куни Халқ депутатлари Қумқўрғон тумани Кенгашининг ҳам навбатдан ташқари сессияси ўтказилди. Сессияда Нормўмин Чориев бошқа ишга ўтганлиги муносабати билан Қумқўрғон тумани ҳокими вазифасидан озод қилинди. Унинг ўрнига шу кунгача вилоят ҳокимининг қишлоқ ва сув хўжалиги масалалари бўйича ўринбосари лавозимида ишлаб келган Раҳматулло Гаппаров Қумқўрғон тумани ҳокими этиб тайинланди.
Раҳматулло Гаппаров 1984 йилнинг 24 майида Қумқўрғон туманида туғилган. 2005 йилда Тошкент ирригация ва мелиорация институтини тамомлаган. 2018 йилда Сурхондарё вилояти ҳокимининг қишлоқ ва сув хўжалиги масалалари бўйича ўринбосари этиб тайинланган. Унга қадар, вилоят қишлоқ хўжалиги бошқармаси бошлиғи лавозимида фаолият юритган.
Изоҳ (0)