Президент Шавкат Мирзиёев 19 сентябрь, пайшанба куни сув ресурсларини бошқариш тизимини ислоҳ қилиш ва сувдан фойдаланиш самарадорлигини ошириш масалалари бўйича йиғилиш ўтказди.
Бугунги кунда сув хўжалиги ташкилотлари тасарруфида 4 мингта суғориш қудуғи мавжуд. Битта қудуқ 30 гектар майдонга хизмат кўрсатиб, йилига 40—50 миллион сўмгача харажат қилинмоқда.
«Суғоришда қудуқ сувини одатдагидек ишлатиш оқибатида ер ости суви борган сари камаймоқда», — деб ёзади Президент матбуот хизмати.
Шунинг учун мутасаддиларга қудуқ сувлари истеъмолчиларини 2020 йилда сув тежовчи технологиялар ва қуёш панелларидан фойдаланишга ўтказиш юзасидан кўрсатмалар берилди.
Яна бир масала — ҳозирда сув объектларини қуриш, реконструкция ва эксплуатация қилиш бўйича ҳам буюртмачи, ҳам пудратчи вазифасини битта идора — Сув хўжалиги вазирлиги амалга оширмоқда.
«Бу эса соғлом рақобатга салбий таъсир кўрсатиши мумкин», — дейилади расмий ахборотда. Шу боис 57 та пудрат корхонасини вазирлик тизимидан чиқариб, алоҳида акциядорлик жамиятига бирлаштириш вазифаси қўйилган.
Изоҳ (0)