Шофирконда онасидан етим қолган қизини мунтазам калтаклаб келган ота — Дилмурод Шодиев Оила кодексининг 79-моддаси 3-бандига асосан оталик ҳуқуқидан маҳрум қилинди. Бу ҳақда Хотин-қизлар қўмитасининг Жамоатчилик ва оммавий ахборот воситалари билан алоқалар хизмати «Дарё»га маълум қилди.
Маълум бўлишича, Дилмурод Шодиев қизи Шукрона Шодиевани мунтазам калтаклаган, ўгай онаси эса қизалоққа тан жароҳатлари етказиб келган. Қизчага мунтазам равишда психологик таъсир ўтказиб келинган.
Шукронани қўшнилар бир неча маротаба уйи яқинида оқиб ўтадиган канал ёқасидан топган. Қизчага кўра, отаси унга ўзини каналга ташлашни буюрган.
Шукронанинг ўгай онаси Ойгул Шердоновага нисбатан Жиноят кодексининг 105-моддаси 1 ва 2-қисмлари, яъни қасддан баданга ўртача оғир шикаст етказиш жиноий иши қўзғатилган.
Қизалоқ тақдирига бефарқ бўлмаган «Маҳаллақози» маҳалла фуқаролар йиғини аъзоси Ҳалима Ҳалимова, Бухоро вилояти хотин-қизлар қўмитаси раиси Феруза Иброҳимова саъй-ҳаракатлари билан Шукрона вилоят болалар шифохонасига даволаш учун ётқизилган.
Шукрона Шодиева Бухоро шаҳридаги 32-сонли Меҳрибонлик уйига жойлаштирилган. Вилоят хотин-қизлар қўмитаси мутасаддилари унга мактаб учун керакли анжомлар, кийим-кечак ва бошқа зарур нарсалар тақдим қилгани, маълум қилинди.
Изоҳ (0)