Адлия вазирлиги депутатлар қўпол ва ҳақоратомуз фикр билдиришга ҳақли эмаслигини эслатди

Олий Мажлиси Қонунчилик палатаси депутати Акмал Умрзоқов Facebook’даги саҳифаси орқали депутатликка номзодини қўймоқчи бўлган блогерларни танқид қилгани ҳақида хабар берилган эди. Депутат ўз постида блогерлар парламентни циркка айлантириб юбориши мумкинлигини таъкидлаганди.

Адлия вазирлигининг «Ҳуқуқий ахборот» Telegram канали депутатлик одоби қоидалари ҳақида маълумот берди.

Қонунчиликда депутатларнинг одоб қоидаларига қатъий риоя этиши белгилаб қўйилган. Ушбу қоидалар Олий Мажлис Қонунчилик палатасида ёки маҳаллий Кенгашларда фаолият юритишидан қатъий назар, ҳар бир депутатга тааллуқли.

Ушбу қоидалар депутатнинг ўз ваколатларини амалга ошириш чоғида мажбурий бўлган хулқ-атвори, маънавий ва ахлоқий принципларини, шунингдек, хулқ-атвор қоидаларини белгилайди.

Масалан, маҳаллий Кенгаш депутати ўз мақомидан фуқароларнинг, жамият ва давлатнинг қонуний манфаатларига зиён етказадиган тарзда фойдаланишига йўл қўйилмайди.

Худди шундай, Олий Мажлис Қонунчилик палатаси депутати оммавий ахборот воситаларида, матбуот конференцияларида, бошқа жамоат тадбирларидаги чиқишларида, омма олдидаги баёнотларида давлат органлари ва бошқа органларнинг, ташкилотларнинг, мансабдор шахсларнинг ва фуқароларнинг фаолиятини шарҳлаганда ўз нутқида уларнинг шаъни ва қадр-қимматига путур етказадиган қўпол, ҳақоратомуз ибора ва сўзларни қўллашга, асоссиз айбловларга йўл қўйишга, била туриб ёлғон ва нотўғри ахборотдан фойдаланишга, қонунга хилоф хатти-ҳаракатларга даъват этишга ҳақли эмас.

Депутатлик одоби бузилган тақдирда депутатнинг хулқ-атвори тўғрисидаги масала Олий Мажлис Қонунчилик палатаси ва тегишли халқ депутатлари Кенгаши томонидан кўриб чиқилади.

Акмал Умрзоқов аввалроқ Тошкентдаги прописка тартибини ёқлаб фикр билдирганида ҳам танқид остида қолганди. Ўшанда у прописка тартибининг бекор қилиниши пойтахтда жиноятчилик кўламининг ошиб кетишига сабаб бўлиши мумкинлигини таъкидлаган эди.