Тошкентда бировнинг пластигидаги 11 млн сўмдан кўпроқ пулни ишлатиб юборган шахсга нисбатан жиноят иши қўзғатилди

Миробод тумани ИИО ФМБга 20 ёшли Артём А. мурожаат қилди, деб хабар беради Тошкент шаҳар ИИББ матбуот хизмати.

Ўз мурожаатида дори воситаларини харид қилиш учун ундан маълум миқдорда пул олган 18 ёшли Руслан Ф.га нисбатан чора кўришни сўраган. Нақд пули бўлмаганлиги сабабли, Артём Русланга ўз банк картасини берган.

Картани олган Руслан Артёмнинг розилигисиз ўз телефонига Click ўрнатиб, ўз банк картасига 11 409 048 сўм миқдоридаги пулларни кўчириб олиб, уларни ўз эҳтиёжига сарфлаб юборган. Ушбу факт бўйича Ўзбекистон Республикаси Жиноят кодексининг 169-моддаси (Ўғрилик) бўйича жиноий иш қўзғатилди.

«Ҳурматли ҳамшаҳарлар ва Тошкент меҳмонлари! Сизнинг ишонувчанлигингиздан ҳаттоки танишларингиз ҳам фойдаланишлари мумкин. Бу каби ҳолатларга дуч келмаслик учун ичида катта миқдордаги пуллар бўлган банк карточкангизни бировга берманг», — дейилади Тошкент шаҳар ИИББ хабарида.