10 сентябрь, сешанба куни Андижон давлат тиббиёт институти клиникасида тиббиёт кислороди ишлаб чиқаришга мўлжалланган мини-завод ишга туширилди. Бу ҳақда «Дарё» мухбири хабар бермоқда.
Мини-завод Соғлиқни сақлаш вазирлиги ва ГИЗнинг «Ўзбекистонда пешқадам тиббий технологияларни бошқариш» лойиҳаси асосида ҳамкорликда амалга оширилди. Лойиҳанинг умумий қиймати 130 минг еврони ташкил этди.
Унинг тантанали очилиш маросимида вилоят соғлиқни сақлаш бошкармаси мутасаддилари, ГИЗ вакиллари ҳамда АДТИ профессор-ўқитувчилари, талабалар иштирок этди.
«Даволаш жараёнларида кенг фойдаланиладиган тиббий кислород илгари баллонларда ташиб олиб келинар эди. Бу эса ўзига яраша қатор қийинчиликларни туғдирар эди. Мини-заводнинг ишга тушиши натижасида нафақат тиббиёт кислородини сотиб олиш учун харажатлар қисқаради, балки беморларга ўз вақтида сифатли кислородни хавфсиз, осон етказиб берилишини таъминлайди. Энг асосийси баллонларни ёнғинга қарши сақлашдаги муаммоларнинг ҳам олди олинади», — дейди Андижон давлат тиббиёт институти ректори Мадаминжон Мадазимов.
Тиббиёт институти матбуот хизматининг маълум қилишича, ГИЗ лойиҳа доирасида клиникада икки кун давомида Андижон, Наманган ва Фарғона вилоятларидаги соғлиқни сақлаш муассасаларида фаолият олиб борувчи жарроҳ ва гинекологлар учун «Гинекологияда лапароскопия ва гистероскопия» мавзусида маҳорат дарслари ўтказилган. Маҳорат дарслари давомида диагностика ва гинекологик касалликларни юқори технологияли тиббий жиҳозлар ёрдамида даволаш бўйича сабоқ берилган.
Маҳорат дарслари сўнггида АДТИ ва ГИЗ ўртасида келгусида кенг ҳамкорлик ва тиббий хизматларнинг сифатини янада ошириш кўзда тутилган икки томонлама меморандум имзоланди.
Изоҳ (0)