Ижтимоий тармоқларда 6 сентябрь куни Бухоро шаҳар маъмурий суди томонидан автомобилларнинг орқа ён ойналарига пардалар ўрнатиш мумкинлиги тўғрисида қарор чиқарилганлиги ҳақида тарқатилган хабарлар тарқалган эди. Ўзбекистон ИИВ Йўл ҳаракати хавфсизлиги бош бошқармаси бу хабарларни ўрганиб чиқиб, қуйидагиларни маълум қилди.

Биринчидан, Вазирлар Маҳкамасининг 2019 йил 2 августдаги «Туси ўзгартирилган (қорайтирилган) ойнали автотранспорт воситаларидан фойдаланишни тартибга солиш бўйича қўшимча чора-тадбирлар тўғрисида»ги қарори билан ҳукуматнинг 2015 йил 24 декабрдаги қарори билан тасдиқланган Йўл ҳаракати қоидаларига ўзгартиришлар киритилган.

Ушбу ўзгартиришларга кўра Йўл ҳаракати қоидалари 3-иловаси (Транспорт воситаларидан фойдаланишни тақиқловчи шартлар) 7.4-бандининг изоҳида III класс М3 тоифадаги автотранспорт воситаларининг (конструксияси йўловчиларни фақат ўтирган ҳолда ташиш учун мўлжалланган автобуслар) орқа ва ён ойналарига пардалар, икки ёнга орқа томонни кўриш учун ташқи кўзгуси мавжуд бўлган барча тоифадаги автотранспорт воситалари орқа ойналарининг тусини ёруғлик ўтказувчанлиги чекланмаган даражада ўзгартиришга (қорайтиришга), шунингдек, ушбу орқа ойналарга парда (чий парда, дарпарда) ўрнатишга рухсат берилиши белгиланган.

Яъни, III класс М3 тоифадаги автотранспорт воситаларидан бошқа тоифадаги транспорт воситаларининг ён ойналарига парда (чий парда, дарпарда) ўрнатиш тақиқланади.

Иккинчидан, Йўл ҳаракати қоидалари 3-иловасининг 7.3-бандига асосан ҳайдовчи жойидан теварак-атроф кўринишини чеклайдиган қўшимча нарсалар ўрнатилган ва қопламалар туширилган бўлса, автотранспорт воситаларидан фойдаланиш тақиқланади.

Учинчидан, ижтимоий тармоқларда тарқатилган хабарларда ГОСТ 33988-2016 (Автомобильные транспортные средства. Обзорность с места водителя. Технические требования и методы испытаний) давлатлараро стандартида келтирилган тушунчалар нотўғри талқин қилинган. Жумладан, «Теварак-атроф кўриниши» (обзорность) ва «Олд томондан теварак-атроф кўриниши» (передняя обзорность) тушунчалари чалкаштириб юборилган.

Ваҳоланки, Йўл ҳаракати қоидалари 3-иловасининг 7.3-бандида ҳайдовчи жойидан теварак-атроф кўриниши, яъни (обзорность) назарда тутилмоқда. Ижтимоий тармоқларда тарқатилган хабарларда эса фақат «Олд томондан теварак-атроф кўриниши» (передняя обзорность) гапирилиб, амалдаги меъёрий ҳужжатлар нотўғри талқин қилинган.

ГОСТ 33988-2016 (Автомобильные транспортные средства. Обзорность с места водителя. Технические требования и методы испытаний) давлатлараро стандартида «Теварак-атроф кўриниши» (обзорность) ва «Олд томондан теварак-атроф кўриниши» (передняя обзорность) тушунчалари аниқ кўрсатиб берилган.

Тўртинчидан, Маъмурий жавобгарлик тўғрисидаги кодекснинг 126-моддасида ҳам «Теварак-атроф кўриниши» (обзорность) тўғрисида кўрсатилган. Яъни, кодекснинг 126-моддаси бўйича маъмурий ҳужжатлар малакаланишида «Теварак-атроф кўриниши» (обзорность) ҳисобга олинади.

«Юқорида баён этилганларга асосан, ИИВ Йўл ҳаракати хавфсизлиги бош бошқармаси 6 сентябрь куни ижтимоий тармоқларда тарқатилган хабарларни асоссиз деб ҳисоблайди. Шунингдек, бош бошқармада Бухоро шаҳар маъмурий суди томонидан чиқарилган қарор тўғрисида аниқ маълумотлар мавжуд эмас», — дейилади ИИВ Йўл ҳаракати хавфсизлиги бош бошқармасининг расмий муносабатида.