«Шарқ тароналари» бош соврини — Гран-при ўзбекистонлик Меҳринигор Абдурашидовага топширилди

Самарқанд шаҳрида «Шарқ тароналари» XII халқаро мусиқа фестивали якунланди, дея хабар бермоқда ЎзА.

Маълумотларга кўра, шу пайтгача ўн бир марта ўтказилган ушбу мусиқа анжуманида дунёнинг 114 давлатидан вакиллар қатнашган. Биргина жорий йилнинг ўзида иштирокчи давлатлар сони 75 тани ташкил этди. Фестиваль танлов дастурларида эса 32 мамлакат мусиқий жамоаси, хонанда ва созандалар қатнашди. Аргентина, Мянма давлатлари ва Фижи ороллари вакиллари «Шарқ тароналари»да илк бор иштирок этди.

Ўн иккинчи фестиваль аввалгилардан бироз ўзгача ўтказилди. Қатнашчилар профессионал тарздаги халқ мусиқа ва қўшиқлари ҳамда анъанавий йўлда ижод қилинган замонавий мусиқа ёки қўшиқ йўналишларида танловда иштирок этди. Уларнинг чиқишларини турли давлатлар мусиқашунослари ва бастакорлар, халқаро ташкилотлар вакилларидан иборат 11 нафар ҳакамдан иборат ҳайъат баҳолаб борди.

26—30 август кунлари дунё санъат аҳлининг бош саҳнасига айланган Регистондаги амфитеатрда «Шарқ тароналари» XII халқаро мусиқа фестивали ғолиб ва совриндорларини тақдирлаш маросими бўлиб ўтди.

Дастлаб, фестиваль қатнашчилари «Энг яхши либос ва мусиқа уйғунлиги», «Меҳр-оқибатни тараннум этгани учун», «Шарқ халқлари мусиқа санъати жонкуяри», «Анъаналарга содиқ жамоа», «Қадриятлар давомчиси» каби номинациялар бўйича тақдирланди. Самарқанд вилояти ва шаҳар ҳокимлиги ҳамда бошқа ташкилотларнинг махсус мукофотлари топширилди.

Номинация ғолибларига диплом, 500 АҚШ долларидан пул мукофоти ва эсдалик совғалари топширилди.

Саҳнага Тожикистон («Бадахшон» жамоаси) ва Россия («Аярхан» жамоаси)дан келган жамоалар ҳамда Ўзбекистон вакиллари — Азизжон Абдуазимов ва Улуғбек Элмуродзода таклиф этилди. Уларга фестивалнинг учинчи даражали дипломлари, 2 минг АҚШ долларидан пул мукофоти ва эсдалик совғалари тақдим этилди.

Иккинчи ўринга Туркманистоннинг «Арчабил» ва Мўғулистоннинг «Хатан» жамоалари сазовор бўлди. Уларга 3,5 минг АҚШ долларидан пул мукофоти, диплом ва бошқа совғалар топширилди.

Фестивальнинг профессионал халқ мусиқа ва қўшиқлари ҳамда анъанавий йўлда ижод қилинган замонавий мусиқа ёки қўшиқ йўналишлари бўйича биринчи ўринга Қирғизистонинг «Қомузчилар» дуэти ҳамда Озарбайжондан келган Парвиз Гасимов муносиб, деб топилди. Уларнинг ҳар бири 5 минг АҚШ доллари миқдоридаги пул мукофоти, диплом ва эсдалик совғалари билан тақдирланди.

Нуфузли ҳакамлар ҳайъати хулосасига кўра, «Шарқ тароналари» XII халқаро мусиқа фестивалининг бош соврини — Гран-при Ўзбекистон вакили Меҳринигор Абдурашидовага берилди.

— Дунёдаги нуфузли санъат фестивали ғолиби бўлганимиздан чексиз ҳаяжон ва қувончдамиз, – дейди Гран-при соҳиби, Ўзбекистон давлат консерваторияси талабаси Меҳринигор Абдурашидова. – Аслида, «Шарқ тароналари»да иштирок этиш, Регистонда қўшиқ куйлашнинг ўзи катта шараф. Бу фестивалда ғолиб бўлиш эса барча иштирокчиларнинг энг катта орзуси ҳисобланади. Бизга бу йил ана шундай бахт насиб этди.

Маросимда Ўзбекистон санъат усталари ва ёш ижрочилар, фестиваль ғолиблари иштирокида концерт дастури намойиш этилди.