Наманган вилоятининг Уйчи туманида тиббиёт буюмлари ишлаб чиқаришга ихтисослашган «AХ medical farm» Ўзбекистон—Хитой қўшма корхонаси иш бошлади. Бу ҳақда «Дарё» мухбири Азизбек Абдувалиев хабар бермоқда.
Қурилиш ишлари 2018 йил март ойида бошланган «AХ medical farm» корхонаси ўз йўналишида ноёб лойиҳа ҳисобланади. Ишлаб чиқариш ҳажми жиҳатидан мамлакатда Нукус шприц заводидан кейин иккинчи ўринда туради.
Бу ерда йилига 100 миллион дона шприц, 300 минг дона аёллар тиббиёт ойнаси ишлаб чиқариш кўзда тутилган. Уларнинг йиллик умумий қиймати 40 миллиард сўмни ташкил қилади. Корхона тўла қувват билан ишга тушгач 110 кишининг бандлиги таъминланади.
«Бунёдкор Махсудбек файз» фермер хўжалиги томонидан амалга оширилган ушбу лойиҳанинг умумий қиймати 2,3 миллион доллар бўлиб, шундан 630 минг доллари хитойлик сармоядор инвестицияси.
— Бу кўп тармоқли фермер хўжалигимизнинг учинчи йирик корхонаси ҳисобланади, — дейди қўшма корхона раҳбари Элмурод Мамадалиев. — 2013 йилда Туркия билан ҳамкорликда ипак гилам тўқиш корхонаси очилган. Бу ерда тайёрланган гиламлар тўлиқ экспортга йўналтирилган. Ўтган ойда Янгиқўрғон туманида йиллик қуввати 1,5 миллион тонна бўлган цемент заводи қурилиши бошланди. Корхонамизга келсак, бу ерда шприц ва тиббиёт ойналаридан ташқари келгуси йили тиббий инфузион системалар ишлаб чиқариш ҳам режалаштирилган. Бунинг учун хитойлик ҳамкоримиз 2 миллион доллар инвестиция киритади.
Корхонанинг очилишига бағишланган тадбирда вилоят ҳокими Хайрулло Бозоров иштирок этди.
Изоҳ (0)