Севастопол Йўл ҳаракати хавфсизлиги бош бошқармаси Россия президенти Владимир Путинга мотоциклни шлемсиз бошқаргани учун жарима солишдан бош тортди. Бу ҳақда Meduza хабар бермоқда.
Владивостокда истиқомат қилувчи ҳуқуқшунос Максим Чихунов Севастопол йўл ҳаракати хавфсизлиги инспекциясидан Россия президенти Владимир Путинни мотоциклни шлемсиз ҳайдагани учун маъмурий жавобгарликка тортишни сўраган эди.
Севастопол ЙХҲББнинг маълум қилишича, йўл ҳаракати қоидалари очилиш маросимларига татбиқ этилмайди. Чунки уларни ўтказиш вақтида йўлларда транспорт ҳаракати бутунлай чекланади.
Эслатиб ўтамиз, Владимир Путин 10 август куни «Тунги бўрилар» мотоклуби ўтказган байк-шоуда «Урал» мотоциклини шлемсиз ҳайдаган.
2018 йилнинг май ойида ҳам Путин Қрим кўприги очилиши маросимида ҳимоя камарини тақмасдан КаМАЗ ҳайдаган эди. Россия Федерал хавфсизлик хизмати йўл қоидаси бузилмаганлигини, Путин кўприкдан расмий очилиш маросими учун юргани, у пайтда йўл умумий фойдаланишда бўлмаганини маълум қилганди.
Изоҳ (0)