Яшнобод туманидаги чебурек тайёрлаш шохобчасида ёнғин содир бўлган. Ёнғинда инсонларнинг ҳалок бўлиши ва тан жароҳати олиши ҳолатлари қайд этилмаган. Бу ҳақда Тошкент шаҳар ЁХБ матбуот хизмати маълум қилди.
Хабар қилинишича, 23 август куни соат 21:05да Яшнобод тумани, Тараққиёт 2-тор кўчаси 23«б» уйда жойлашган «Иттифоқ савдо сервис» МЧЖга қарашли бинода чебурек тайёрлаш шохобчасининг 60 кв.м майдонида ёнган. Ёнғиндан бинонинг 100 кв.м. майдонидаги қурилмалари сақланиб қолинган. Ёнғин ўчириш жанговар бўлинмалари чақирилган манзилга соат 21:14да етиб борган ва кўрилган тезкор чора-тадбирлар натижасида ёнғин соат 21:20да қуршаб олиниб, соат 21:27да бартараф этилган. Ёнғин жойига 4 та ёнғин ўчириш техникаси жалб қилинган.
Ёнғин электр симларининг қисқа туташуви оқибатида содир бўлган, деб тахмин қилинмоқда. Ёнғиндан келтирилган моддий зарар миқдори аниқланмоқда.
«Тошкент шаҳар Ёнғин хавфсизлиги бошқармаси барча фуқаролардан ёнғин хавфсизлиги қоидаларига қатъий риоя этишларини сўраб қолади»,— дейилади хабарда.
Изоҳ (0)