Фотогалерея: Шимолий Кореяда мактаб ўқувчилари ҳаёти ҳақида

Шимолий Кореяда мактаб ўқувчиларининг ҳаёти ҳақида деярли маълумотлар йўқ. Бу ерга ташриф буюрган хорижликлар фақат ижобий таассуротлар уйғота оладиган йўналишлар бўйича саёҳат қилиши қаттиқ назорат қилинади. Чет элликларга маҳаллий аҳоли билан мулоқот қилиш қатъиян тақиқланади.

Шимолий Кореялик болалар мактабда 12 йил, ҳафтасига 6 кун ўқишади. Дарс жадвали давлат эҳтиёжларига қараб ўзгартирилади

Шимолий Кореяда болалар бошланғич мактабда ўқишни 4 ёшдан бошлайди. 5 ёшдан 6 ёшгача бўлган 1 йил барча болалар учун мажбурий ҳисобланади. Мактабларда узлуксиз таълим 12 йилга тенг бўлиб, болалар 1950 йилдан буён Совет таълим тизими асосида ўқитилган. Бироқ 2012 йилда таълим тизимини замонавий эҳтиёжларга мослаштириш мақсадида ўрта таълим қайта ислоҳ қилинган. Шу даврдан бошлаб, болалар 6 йил бошланғич мактабда, 3 йил ўрта мактабда ва яна 3 йил катта мактабда ўқитилади.

Шимолий Кореяда болалар ҳафтада 6 кун ўқийди, шанба куни эса дарслар камроқ бўлади. Дарслар соат 8 дан бошланади. Ўқув йили 2 семестрдан иборат: 1 апрелдан 31 июлга қадар ва 1 сентябрдан март охиригача. Мактабларда ёзги, қишки ҳамда баҳорги таътиллар бор.

Ёзда омади чопган ўқувчилар «Sondovon» халқаро болалар оромгоҳида дам олиши мумкин. «Sondovon» болалар оромгоҳига Россия, Хитой, Покистон, Вьетнам, Бразилия ҳамда Африка мамлакатларидан ўқувчилар дам олиш учун ташриф буюради. Кореялик болажонлар учун оромгоҳ бепул, хорижлик болалар учун 2 ҳафта дам олиш – €450га тенг.

Шимолий Кореяда мактаб формалари давлат томонидан тақдим этилади

Ота-оналарга формаларни сотиб олиш ёки тиктириш тақиқланган. Мактаблар давлат раҳбари Ким Чен Ин шахсан белгилаб берган намунадаги формалар билан таъминланади. Бироқ доим ҳам ушбу ваъдага амал қилинмайди. Баъзида форма етмаса, баъзида сифати тўғри келмай қолади. Туристлар кўп ташриф буюрадиган пойтахт – Пхеньянда мактаб формалари қаттиқ назорат қилинади.

 

Шунингдек, болалар иттифоқига қўшилган ўқувчилар, кўкрагининг чап томонига мамлакат раҳбарларининг суратлари туширилган значок ва қизил галстук тақиб юришлари шарт.

Шимолий Кореянинг турли мактабларида ўқитиш даражаси бошқача

Иқтидорли болалар учун махсус элита мактабларида ўқиш обрўли ҳисобланади. Бундай мактабларни тамомлаган ўқувчилар ОТМга кирган ҳисобланади.

Бундан ташқари, мамлакатда репетиторлар кўп. Ўқитиладиган асосий фанлар – инглиз тили ва математика. Қўшимча дарслар ойига $10-30 га тенг.

Футболга лаёқати бор болалар халқаро футболчилар мактабида ўқийди. Футболчилар мактабида атига 200 та ўқувчи ўқийди. Бу ўқувчиларининг хорижга кетиш имконияти бошқаларга нисбатан кўпроқ ҳисобланади.

Шимолий Кореядаги мактабларда ўқиш бепул, аммо ота-оналар синф учун, мебелларни таъмирлаш ва зарур жиҳозларни сотиб олиш учун ҳар ойда оз миқдорда пул тўлашлари шарт.

Шимолий Корея мактаблари бутун дунёдаги ўқувчилар билан бир хил билим олади, аммо мамлакатда қўшимча фанлар ҳам мавжуд

Мактабларда математика, она тили, адабиёт, тарих, география ва хорижий ўқитилади. Инглиз тилининг британча варианти ўргатилади. Шунингдек, «Коммунистик ахлоқ», «Коммунистик партия сиёсати», «Буюк Ким Ир Сунг ҳаёти» сингари фанлар мавжуд.

Болалар ёшлигидан қатъий интизомга ўргатилади. Мактаб ва болалар боғчасида бир қанча маросимлар ва расмиятчиликлар бор. Масалан, жўр бўлиб қасамёд қилиш, таъзим қилиш ва бошқалар.