Fotogalereya: Shimoliy Koreyada maktab o‘quvchilari hayoti haqida

Shimoliy Koreyada maktab o‘quvchilarining hayoti haqida deyarli ma’lumotlar yo‘q. Bu yerga tashrif buyurgan xorijliklar faqat ijobiy taassurotlar uyg‘ota oladigan yo‘nalishlar bo‘yicha sayohat qilishi qattiq nazorat qilinadi. Chet elliklarga mahalliy aholi bilan muloqot qilish qat’iyan taqiqlanadi.

Shimoliy Koreyalik bolalar maktabda 12 yil, haftasiga 6 kun o‘qishadi. Dars jadvali davlat ehtiyojlariga qarab o‘zgartiriladi

Shimoliy Koreyada bolalar boshlang‘ich maktabda o‘qishni 4 yoshdan boshlaydi. 5 yoshdan 6 yoshgacha bo‘lgan 1 yil barcha bolalar uchun majburiy hisoblanadi. Maktablarda uzluksiz ta’lim 12 yilga teng bo‘lib, bolalar 1950-yildan buyon Sovet ta’lim tizimi asosida o‘qitilgan. Biroq 2012-yilda ta’lim tizimini zamonaviy ehtiyojlarga moslashtirish maqsadida o‘rta ta’lim qayta isloh qilingan. Shu davrdan boshlab, bolalar 6 yil boshlang‘ich maktabda, 3 yil o‘rta maktabda va yana 3 yil katta maktabda o‘qitiladi.

Shimoliy Koreyada bolalar haftada 6 kun o‘qiydi, shanba kuni esa darslar kamroq bo‘ladi. Darslar soat 8 dan boshlanadi. O‘quv yili 2 semestrdan iborat: 1-apreldan 31-iyulga qadar va 1-sentabrdan mart oxirigacha. Maktablarda yozgi, qishki hamda bahorgi ta’tillar bor.

Yozda omadi chopgan o‘quvchilar “Sondovon” xalqaro bolalar oromgohida dam olishi mumkin. “Sondovon” bolalar oromgohiga Rossiya, Xitoy, Pokiston, Vyetnam, Braziliya hamda Afrika mamlakatlaridan o‘quvchilar dam olish uchun tashrif buyuradi. Koreyalik bolajonlar uchun oromgoh bepul, xorijlik bolalar uchun 2 hafta dam olish – €450ga teng.

Shimoliy Koreyada maktab formalari davlat tomonidan taqdim etiladi

Ota-onalarga formalarni sotib olish yoki tiktirish taqiqlangan. Maktablar davlat rahbari Kim Chen In shaxsan belgilab bergan namunadagi formalar bilan ta’minlanadi. Biroq doim ham ushbu va’daga amal qilinmaydi. Ba’zida forma yetmasa, ba’zida sifati to‘g‘ri kelmay qoladi. Turistlar ko‘p tashrif buyuradigan poytaxt – Pxenyanda maktab formalari qattiq nazorat qilinadi.

 

Shuningdek, bolalar ittifoqiga qo‘shilgan o‘quvchilar, ko‘kragining chap tomoniga mamlakat rahbarlarining suratlari tushirilgan znachok va qizil galstuk taqib yurishlari shart.

Shimoliy Koreyaning turli maktablarida o‘qitish darajasi boshqacha

Iqtidorli bolalar uchun maxsus elita maktablarida o‘qish obro‘li hisoblanadi. Bunday maktablarni tamomlagan o‘quvchilar OTMga kirgan hisoblanadi.

Bundan tashqari, mamlakatda repetitorlar ko‘p. O‘qitiladigan asosiy fanlar – ingliz tili va matematika. Qo‘shimcha darslar oyiga $10-30 ga teng.

Futbolga layoqati bor bolalar xalqaro futbolchilar maktabida o‘qiydi. Futbolchilar maktabida atiga 200 ta o‘quvchi o‘qiydi. Bu o‘quvchilarining xorijga ketish imkoniyati boshqalarga nisbatan ko‘proq hisoblanadi.

Shimoliy Koreyadagi maktablarda o‘qish bepul, ammo ota-onalar sinf uchun, mebellarni ta’mirlash va zarur jihozlarni sotib olish uchun har oyda oz miqdorda pul to‘lashlari shart.

Shimoliy Koreya maktablari butun dunyodagi o‘quvchilar bilan bir xil bilim oladi, ammo mamlakatda qo‘shimcha fanlar ham mavjud

Maktablarda matematika, ona tili, adabiyot, tarix, geografiya va xorijiy tillar o‘qitiladi. Ingliz tilining britancha varianti o‘rgatiladi. Shuningdek, “Kommunistik axloq”, “Kommunistik partiya siyosati”, “Buyuk Kim Ir Sung hayoti” singari fanlar mavjud.

Bolalar yoshligidan qat’iy intizomga o‘rgatiladi. Maktab va bolalar bog‘chasida bir qancha marosimlar va rasmiyatchiliklar bor. Masalan, jo‘r bo‘lib qasamyod qilish, ta’zim qilish va boshqalar.