Бу йил «Шарқ тароналари» ўн иккинчи халқаро мусиқа фестивалидадунёнинг 78 та хорижий давлатлардан 293 нафар иштирокчи қатнашиши кутилмоқда. Фестивалнинг тайёргарлик жараёнлари давом этмоқда.
Бу ҳақда «Дарё» мухбири Феруз Муҳаммадга Маданият вазирлиги матбуот хизмати маълум қилди.
«Шарқ тароналари» халқаро мусиқа фестивали танлови иштирокчилар — 32 давлатдан, 28 та мусиқий жамоа, 140 нафар иштирокчи қатнашади. Шунингдек, ОАВ вакиллари — 20 та давлатдан 41 нафар журналист келиши кутилмоқда.
Бу йил танлов иштирокчиларининг чиқишлари икки йўналиш – профессионал тарздаги халқ мусиқа ва қўшиқлари ҳамда анъанавий йўлда ижод қилинган замонавий мусиқа - қўшиқ йўналишларида баҳоланади.
Иштирокчиларнинг чиқишларини етти кишидан кам бўлмаган халқаро ҳайъат баҳолаб боради. Халқаро ҳайъатга хорижий ва маҳаллий мусиқашунос олимлар, таниқли санъаткорлар, композиторлар ва бастакорлар, хорижий давлатлардаги халқаро санъат фестиваллар ташкилоти вакиллари таклиф этилади.
Фестиваль Гран-при соҳибига 10 минг АҚШ доллари миқдорида пул мукофоти берилади. Иккита 1-ўринга 5 мингдан, иккита 2-ўринга 3 минг 5 юздан ва учта 3-ўринни эгаллаган иштирокчиларга 2 минг АҚШ долларидан пул мукофоти берилади.
Шунингдек, бу йил «Энг ёш иштирокчи», «Мухлислар эътирофига сазовор бўлган энг яхши иштирокчи», «Энг яхши чолғу мусиқаси ижрочиси» каби номинацияларда ҳам ғолиблар махсус диплом ҳамда 500 АҚШ доллари миқдорида пул мукофоти билан тақдирланади.
Регистон майдони атрофида Республика вилоятлари, Тошкент шаҳри ва Қорақалпоғистон Республикаси вакилларига ҳам ўз санъати, маданияти ва анъаналарини кўрсатишлари учун жой ажратилади. Улар бу жойларда кичик саҳналар ўрнатиб, миллий чолғу асбоблари, ҳунармандчилик буюмлари кўргазмалари ташкил этилади.
Изоҳ (0)