Bu yil “Sharq taronalari” o‘n ikkinchi xalqaro musiqa festivalidadunyoning 78 ta xorijiy davlatlardan 293 nafar ishtirokchi qatnashishi kutilmoqda. Festivalning tayyorgarlik jarayonlari davom etmoqda.
Bu haqda “Daryo” muxbiri Feruz Muhammadga Madaniyat vazirligi matbuot xizmati ma’lum qildi.
“Sharq taronalari” xalqaro musiqa festivali tanlovi ishtirokchilar — 32 davlatdan, 28 ta musiqiy jamoa, 140 nafar ishtirokchi qatnashadi. Shuningdek, OAV vakillari — 20 ta davlatdan 41 nafar jurnalist kelishi kutilmoqda.
Bu yil tanlov ishtirokchilarining chiqishlari ikki yo‘nalish – professional tarzdagi xalq musiqa va qo‘shiqlari hamda an’anaviy yo‘lda ijod qilingan zamonaviy musiqa -qo‘shiq yo‘nalishlarida baholanadi.
Ishtirokchilarning chiqishlarini yetti kishidan kam bo‘lmagan xalqaro hay’at baholab boradi. Xalqaro hay’atga xorijiy va mahalliy musiqashunos olimlar, taniqli san’atkorlar, kompozitorlar va bastakorlar, xorijiy davlatlardagi xalqaro san’at festivallar tashkiloti vakillari taklif etiladi.
Festival Gran-pri sohibiga 10 ming AQSh dollari miqdorida pul mukofoti beriladi. Ikkita 1-o‘ringa 5 mingdan, ikkita 2-o‘ringa 3 ming 5 yuzdan va uchta 3-o‘rinni egallagan ishtirokchilarga 2 ming AQSh dollaridan pul mukofoti beriladi.
Shuningdek, bu yil “Eng yosh ishtirokchi”, “Muxlislar e’tirofiga sazovor bo‘lgan eng yaxshi ishtirokchi”, “Eng yaxshi cholg‘u musiqasi ijrochisi” kabi nominatsiyalarda ham g‘oliblar maxsus diplom hamda 500 AQSh dollari miqdorida pul mukofoti bilan taqdirlanadi.
Registon maydoni atrofida Respublika viloyatlari, Toshkent shahri va Qoraqalpog‘iston Respublikasi vakillariga ham o‘z san’ati, madaniyati va an’analarini ko‘rsatishlari uchun joy ajratiladi. Ular bu joylarda kichik sahnalar o‘rnatib, milliy cholg‘u asboblari, hunarmandchilik buyumlari ko‘rgazmalari tashkil etiladi.
Izoh (0)