Андижон шаҳридаги «Янги бозор» деҳқон бозори мажмуаси қайта реконструкция қилиниб, фойдаланишга топширилди. Бу ҳақда вилоят бозорлари ва савдо комплекслари уюшмаси матбуот хизмати «Дарё»га хабар берди.
1,5 йил давом этган қурилиш ишларига 14 миллиард сўмдан зиёд маблағ сарфланган. Натижада бу ерда сотувчи ва харидорлар учун қатор қулайликлар яратилган икки қаватли савдо мажмуаси ҳамда ёзги павильон, ошхона ва автотураргоҳ ишга туширилган.
224 ўринли савдо мажмуасининг биринчи қаватида турли арзон ва сифатли озиқ-овқат, иккинчи қаватида эса кийим-кечак маҳсулотлари савдоси йўлга қўйилган. Харидор ва сотувчиларга қулайлик яратиш мақсадида 10 та қўл ва битта маҳсулотларни ювиш раковиналари, чиқиб тушиш учун эскалатор, юк ташувчи лифт, ҳаво ҳарорати мўътадиллигини сақлаш учун кондиционер ўрнатилган. Шунингдек, хавфсизликни таъминлаш мақсадида 50 та видеокузатув камераларидан иборат ситуацион ҳамда ёнғиннинг олдини олиш тизимлари йўлга қўйилган.
Фойдаланишга топширилган деҳқон бозори павильонларида гўшт, сут, тухум ва бошқа озиқ-овқат маҳсулотлари ҳамда хўжалик моллари сотишга мўлжалланган 580 та савдо растаси мавжуд.
Вилоятда махсус дастур асосида 14 та замонавий савдо мажмуаси бунёд этилмоқда. Сўнгги икки йил давомида Асака, Шаҳрихон, Олтинкўл, Хўжаобод ва Андижон туманларида барча шароитларга эга савдо мажмуалари қурилиб, ишга туширилди. Жорий йил якунига қадар эса режага асосан Булоқбоши, Бўз, Избоскан, Балиқчи, Марҳамат туманлари ҳамда Андижон шаҳридаги улгуржи деҳқон бозорларида олиб борилаётган қурилиш ишларини якунлаб, фойдаланишга топшириш белгиланган.
Изоҳ (0)