Andijon shahridagi “Yangi bozor” dehqon bozori majmuasi qayta rekonstruksiya qilinib, foydalanishga topshirildi. Bu haqda viloyat bozorlari va savdo komplekslari uyushmasi matbuot xizmati “Daryo”ga xabar berdi.
1,5 yil davom etgan qurilish ishlariga 14 milliard so‘mdan ziyod mablag‘ sarflangan. Natijada bu yerda sotuvchi va xaridorlar uchun qator qulayliklar yaratilgan ikki qavatli savdo majmuasi hamda yozgi pavilyon, oshxona va avtoturargoh ishga tushirilgan.
224 o‘rinli savdo majmuasining birinchi qavatida turli arzon va sifatli oziq-ovqat, ikkinchi qavatida esa kiyim-kechak mahsulotlari savdosi yo‘lga qo‘yilgan. Xaridor va sotuvchilarga qulaylik yaratish maqsadida 10 ta qo‘l va bitta mahsulotlarni yuvish rakovinalari, chiqib tushish uchun eskalator, yuk tashuvchi lift, havo harorati mo‘tadilligini saqlash uchun konditsioner o‘rnatilgan. Shuningdek, xavfsizlikni ta’minlash maqsadida 50 ta videokuzatuv kameralaridan iborat situatsion hamda yong‘inning oldini olish tizimlari yo‘lga qo‘yilgan.
Foydalanishga topshirilgan dehqon bozori pavilyonlarida go‘sht, sut, tuxum va boshqa oziq-ovqat mahsulotlari hamda xo‘jalik mollari sotishga mo‘ljallangan 580 ta savdo rastasi mavjud.
Viloyatda maxsus dastur asosida 14 ta zamonaviy savdo majmuasi bunyod etilmoqda. So‘nggi ikki yil davomida Asaka, Shahrixon, Oltinko‘l, Xo‘jaobod va Andijon tumanlarida barcha sharoitlarga ega savdo majmualari qurilib, ishga tushirildi. Joriy yil yakuniga qadar esa rejaga asosan Buloqboshi, Bo‘z, Izboskan, Baliqchi, Marhamat tumanlari hamda Andijon shahridagi ulgurji dehqon bozorlarida olib borilayotgan qurilish ishlarini yakunlab, foydalanishga topshirish belgilangan.
Izoh (0)