13 август куни, Москва вилоятида жойлашган Алабино дала-ўқув майдонида Халқаро армия ўйинларининг «Танк биатлони» йўналиши бўйича ярим финал баҳслари ўз ниҳоясига етди. Унда иштирок этган Ўзбекистон жамоаси энг яхши натижани қайд этиб, финалга йўл олди. Бу ҳақда Мудофаа вазирлиги Ахборот ва оммавий коммуникациялар департаменти «Дарё»га маълум қилди.
Баҳслар давомида жамоаларнинг ҳар учала экипаж аъзолари катта майдонга тушиб, эстафеда шартини бажарди. Шарт давомида улар тўсиқлардан талофатсиз ўтиш, белгиланган нишонларни йўқ қилиш ва имкон қадар қисқа вақт ичида финиш чизиғини босиб ўтиши керак эди.
«Юртдошларимиз Т-72 Б-3 танкини маҳорат билан бошқариб, барча иштирокчи жамоалар ичида энг яхши натижани қайд этишди. Вакилларимиз жами 2 соату 37 сонияда маррага биринчи бўлиб етиб келди. Бу вақт ичида 10 та нишон яксон қилинди», — дейилади хабарда.
Таққослаш учун айтиш мумкинки, Ўзбекистон жамоаси билан финалда куч синашадиган Вейтнам жамоаси 2 соат 44 дақиқаю 28 сония, Куба 2 соат 44 дақиқаю 36 сония, Уганда эса 3 соат 2 дақиқаю 39 сония кўрсаткич билан финалга йўл олган.
«Танк биатлони» мусобақаси 2 гуруҳда ўтказилаётган бўлиб, Ўзбекистон жамоаси унда иккинчи гуруҳдаги жамоалар билан баҳсга киришган. Бунда ҳар бир гуруҳдан алоҳида ғолиб ва совриндорлар номи аниқланади. Ўзбекистонлик ҳарбийларнинг натижаларини биринчи гуруҳда иштирок этиб, финалга йўл олган жамоалар кўрсаткичига таққосланадиган бўлса, жамоа ҳар иккала гуруҳдан мусобақанинг финал босқичига йўл олган давлат вакиллари ичида 5-ўринни қайд этмоқда.
«Танк биатлони» мусобақасининг финал баҳси 15 август куни бўлиб ўтади.
Изоҳ (0)