Ўзбекистон Лига Кубоги. Барча ярим финалчилар маълум бўлди

14 август, чоршанба куни футбол бўйича Ўзбекистон Лига Кубогининг чорак финали учрашувлари бўлиб ўтди.

Қаршининг «Насаф» клуби меҳмонда «Қўқон-1912» жамоасига қарши майдонга тушди.

Ўйиндаги ягона голга қўқонликлар ҳужумчиси Шаҳбоз Эркинов 54-дақиқада муаллифлик қилди.

Шу тариқа Рўзиқул Бердиев шогирдлари мусобақанинг 1/4 финалида «Қўқон-1912»га кичик ҳисобда имкониятни бой бериб қўйди ва мусобақадаги юришини тўхтатди (0:1).

Шу куни Самарқанднинг «Динамо»си ўз майдонида «Андижон»ни қабул қилди.

Беллашувнинг 68-дақиқасида Андижон клуби вакили Илдар Маматказин ўз дарвозасига гол уриб қўйган бўлса, 77-дақиқага келиб «Динамо» ҳужумчиси Баҳодир Насимов ҳисобни 2:0 кўринишига олиб келди. Орадан 2 дақиқа ўтиб, андижонликлар аъзоси Даврон Исоқов ҳисобни қисқартирди (2:1).

Натижа «Динамо» ўз уйида «Андижон»ни мағлуб этиб, мусобақанинг кейинги босқичи йўлланмасини қўлга киритди.

Шота Арвеладзе қўл остидаги Тошкентнинг «Пахтакор» клуби «Шўртан»ни синовдан ўтказди.

Учрашув давомида «шерлар» аъзолари Достонбек Ҳамдамов (65, 90+3) дублга эришган бўлса, Шерзод Аъзамов ўз номига битта гол ёздириб қўйди (3:0).

Шу тариқа «Пахтакор» «Шўртан» дарвозасига жавобсиз 3 та гол уриб, Лига Кубогининг ярим финалига йўл олди.

Миржалол Қосимов бошлиқ Олмалиқнинг ОКМК жамоаси Бекободнинг «Металлург» клуби билан беллашди.

Баҳснинг 37-дақиқасида ОКМК ҳужумчиси Зафар Полвонов ўйиндаги ягона голга муаллифлик қилди (1:0).

Ўзбекистон Лига Кубогининг 1/4 финал баҳслари якунига кўра, ярим финалда «Қўқон-1912», «Динамо», «Пахтакор» ҳамда ОКМК жамоалари иштирок этадиган бўлди.