Аввал хабар берганимиздек, жорий йил 7—8 август кунлари Фарғона шаҳрида хориж бизнес ҳамжамиятини вилоятнинг иқтисодий салоҳияти ва инвестицион имкониятлари билан таништириш мақсадида халқаро инвестиция форуми ўтказилди.
Тадбир Фарғона вилояти ҳокимлиги, Ташқи ишлар ҳамда Инвестиция ва ташқи савдо вазирликлари томонидан ташкил этилди.
Форум ишида Ўзбекистоннинг Уммон ва Қирғизистондаги элчилари, дунёнинг 30 давлатидан келган 150 нафардан ортиқ бизнесмен, Ўзбекистондаги дипломатик корпус ҳамда етакчи хорижий ОАВнинг ТИВ ҳузурида аккредитациядан ўтган вакиллари иштирок этди.
Тадбирнинг расмий очилиш қисмидан сўнг Фарғона вилоятининг саноат салоҳиятини изчил ошириш, ҳудудга илғор технологиялар ва хорижий инвестицияларни жалб қилиш ҳамда соғлиқни сақлаш, таълим, маданият ва спорт соҳаларида бошланган ислоҳотларни янада такомиллаштиришга бағишланган 3 та секция мажлиси ўтказилди.
7 август куни тушдан сўнг ҳудуддаги янги инвестиция лойиҳалари, ҳозирда ишлатилмаётган ва фойдаланиш учун тайёр ишлаб чиқариш биноларининг тақдимотлари бўлиб ўтди. Форум иштирокчилари маҳаллий ишлаб чиқарувчиларнинг «Фарғонада ишлаб чиқарилган» номли кўргазмасига ҳам ташриф буюриб, экспортга мўлжалланган маҳсулотлар билан танишди.
Форум «B2B» ва «B2Г» шаклларидаги кооперацион биржада давом эттирилиб, унинг якунлари кўра қиймати 350 миллион АҚШ долларидан ортиқ бўлган ҳужжатлар имзоланди.
Тадбир қатнашчилари маҳаллий ишлаб чиқариш корхоналарига ташриф буюриб, уларнинг фаолияти билан ҳам танишди, истиқболли инвестиция лойиҳалари, инвесторларга таклиф қилинаётган бино ва қурилмалар, бекор турган ер майдонларининг тақдимоти ўтказилди.
Форум иштирокчилари учун Фарғона вилоятининг асосий қадамжолари бўйлаб инфо-тур ҳам ташкил этилди.
Изоҳ (0)