Buxoroda “Olmaota—Nukus” yo‘nalishida harakatlanayotgan avtobusning ag‘darilib ketishiga haydovchini uyqu elitishi sabab bo‘lgan. Bu haqda Buxoro viloyati IIB huzuridagi tergov boshqarmasi “Daryo”ga ma’lum qildi.
4-avgust kuni “Buxoro—Xorazm” (Olmaota—Nukus) yo‘nalishida harakatlanib borayotgan yo‘lovchi avtobusi yo‘l chizig‘idan chiqib ketib, ag‘darilgani haqida xabar berilgan edi. Yo‘l transport hodisasi oqibatida avtobusda 1 nafar yo‘lovchi voqea joyida vafot etib, 2 nafar shaxs og‘ir va 8 nafar shaxs turli darajadagi tan jarohatlari olgan.
Buxoro viloyati IIB huzuridagi tergov boshqarmasi tomonidan olib borilgan tezkor harakatlar natijasida holatga oydinlik kiritilgan. Van Hool rusumli, KZ545 APV13 raqam belgili ushbu yo‘lovchi avtobus qozog‘istonlik “Yug Trans Layn” jamiyati haydovchisi Rustamjon Aliyev boshqaruvida bo‘lgan. Rustamjon Aliyev uyqu eltishi tufayli Jondor tumanidagi “Luqmon” MFYga qarashli cho‘l hududidan o‘tuvchi A-380 xalqaro ahamiyatdagi yo‘l — Buxoro—Xorazm (Olmaota—Nukus) yo‘nalishining 299-kilometrida boshqaruvni yo‘qotgan. Oqibatda avtobus yo‘l chizig‘idan chiqib ketgan va ag‘darilgan.
Avtobusda jami 46 kishi bo‘lgan, ulardan 13 nafari qozog‘istonlik, 33 nafari esa o‘zbekistonlik bo‘lgan.
Avariya natijasida 2008-yilda Qoraqalpog‘istonda tug‘ilgan, voyaga yetmagan Aray Umurzakova voqea joyida vafot etgan. 12 nafar yo‘lovchi esa avariyadan so‘ng yo‘lovchi transportlar orqali yashash manzillariga ketib qolgan. Hozirda ushbu fuqarolarning ham shaxsini aniqlash bo‘yicha tezkor-surishtiruv ishlari olib borilmoqda.
Buxoro viloyat hokimligi matbuot xizmati xabariga ko‘ra, viloyat rahbari O‘ktam Barnoyev yo‘l transport hodisasi oqibatida jabrlanganlar holidan xabar olish uchun Respublika shoshilinch tibbiy yordam ilmiy markazi Buxoro filialiga kelgan.
— Mudhish avariya sodir bo‘lgani haqidagi xabar kelgach, zudlik bilan yetib kelindi va jabrlanganlar Gazli shaharchasidagi shifoxonaga yetkazildi. Ularga zarur tibbiy yordam ko‘rsatildi. Jabr ko‘rgan va ahvoli nisbatan xavotirli bo‘lgan 12 nafar fuqaro Respublika shoshilinch tibbiy yordam ilmiy markazi Buxoro filialiga olib kelindi. 8 nafariga shoshilinch tibbiy yordam ko‘rsatilib, ahvoli o‘nglangach, uylariga ruxsat berildi. Qolgan 4 nafar bemorning ahvoli o‘rtacha og‘irlikda bo‘lib, muolajalar davom ettirilmoqda, — dedi viloyat sog‘liqni saqlash boshqarmasi boshlig‘i Ilhom Narziyev.
Holat yuzasidan avtobus haydovchisi Rustamjon Aliyevga nisbatan O‘zbekiston Respublikasi Jinoyat Kodeksining 266-moddasi 2-qismi bilan jinoyat ishi qo‘zg‘atilib, dastlabki tergov harakatlari olib borilmoqda.
Izoh (0)