Ўтган ҳафта Туриннинг «Ювентус» клуби Жанубий Кореянинг Сеул шаҳрида К-Лига юлдузларидан ташкил топган терма жамоага қарши майдонга тушиб, 3:3 ҳисобида дуранг ўйнади. Аммо учрашувда ташриф буюрган 63 минг мухлисдан кўпчилигининг хафсаласи пир бўлди. Боиси, Турин клубининг асосий юлдузи Криштиану Роналду майдонга тушмади. Энди эса «Ювентус» муаммоларга дуч келиши кутилмоқда.
Учрашувдан олдин ўйин ташкилотчиси The Fasta Криштианунинг камида 45 дақиқада майдонда бўлишини маълум қилди. Таъкидланишича, «Ювентус» билан бу борада келишув ҳам тузилган. Анонсда Роналдунинг майдонга тушиши айтилганининг ўзи ҳам чипталарга сотувига катта таъсир ўтказди. Ўйинга кўплаб мухлислар ҳам Роналду сабаб келгани рост эди.
Оқибатда Роналду барибир ҳам майдонга тушмади. Аммо «Ювентус» деярли асосий таркиб билан ўйнади: Шесни — Канселу, де Лигт, Ругани, Беруатто — Жан, Пьянич, Мураторе — Бернардески, Игуаин, Манжукич.
Иккинчи бўлимда Роналду стадиондаги таблоларга олиб чиқилди. Мухлислар эса ҳуштакбозликни бошлаб юборди. Роналдуни кутишдан фойда йўқлигини билишгач эса «Месси» дея ҳайқиришга тушишди.
Энди эса бир қанча мухлислардан ташкил топган гуруҳ дунёнинг энг яхши ўйинчиларидан бирини кўрмаганликлари учун судга мурожаат қилади. Ҳозирча судга икки киши бу борада мурожаат қилишга улгурди. Улар чипта пулини (59 доллар) қайтаришларини ва етказилган маънавий зарарни (847 доллар) талаб қилмоқда. Жабрланганларнинг адвокати эса судга бу борада яна 60 минг мухлис мурожаат қилиши мумкин деган қарашни илгари сурган.
«Бундай ҳолатларда жабрланганларга одатда чипта пули қайтарилади. Аммо «Ювентус» билан содир бўлган ҳолат бошқачароқ. Ташкилотчилар ёлғон реклама орқали мухлисларни алдаган», — дейди адвокат.
Ташкилотчи The Fasta компанияси ҳам бу ҳолатдан ҳайратда қолганини яширмаган. «Вазиятни муҳокама қилиш учун Недведнинг олдига бордим. У эса: Мен ҳам Роналдунинг майдонга тушишини хоҳлардим. Аммо унинг ўзи буни истамаяпти. Кечирасиз, ҳеч нарса қила олмайман, деди. Қаттиқ ғазабладим», — дейди компания бош директори Робин Чанг.
«Ювентус»нинг ўзи эса бу ҳолатга ҳозиргача расмий изоҳ бермади. Бироқ К-Лига юлдузлар терма жамоаси устози Жозе Мораиш(Жозе Моуриньо билан бирга «Реал»да фаолият олиб борган) бу ҳақда ўйиндан сўнг қуйидагиларни маълум қилди: «Учрашувдан сўнг Роналдуга мурожаат қилдим. У ўйинга тайёр бўлмаганини айтди. У Хитойда тўлиқ ўйин ўтказгани ва узоқ вақт давом этган парвоз сабаб толиққанини таъкидлади».
Ҳозирча бу ҳолатнинг «Ювентус»га қанчалик зарар етказиши номаълум. Боиси, мухлислар ташкилотчи — The Fasta компанияси устидан шикоят қилмоқда. Ўз навбатида ташкилотчилар Турин клубини судга бериши мумкин.
Қайд этиш жоиз, Жанубий Корея футбол ассоциацияси 30 июнь куни «Ювентус» шартнома шартларини бузгани учун, клуб устидан судга протест киритгани ҳақида маълум қилди.
Воқеалар ривожини эса кузатишда давом этамиз.
Бонус+
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)