Урганч шаҳар ҳокими Шуҳрат Абдуллаев норозилик туфайли Урганч—Ҳазорасп автомобиль йўлини тўсиб қўйган аҳоли вакилларига чора кўрилмаслигини билдирди. У бу ҳақда «Дарё» мухбири Мусулмонбек Иброҳимов билан бўлиб ўтган суҳбатда айтиб ўтди.
Хоразм вилояти Урганч шаҳридаги «Ашхобод» маҳалласида яшовчи аҳолига ер ўрни ажратиб берилган, аммо компенсация пули тўланмаганди. Ҳокимлик вакиллари бир қанча вақтдан бери ваъда бериб келган, ниҳоят сабр косаси тўлган юзлаб уйсиз фуқаролар 26 июль куни кечаси 21:00 да Урганч—Ҳазорасп автомобиль йўлини тўсиб қўйган. Вилоят ҳокими келганда унинг палаткасини йиқитиб юборган.
Вазиятга аралашган вилояти ҳокими Фарҳод Эрманов 10 августгача компенсация бўйича тўлиқ ҳисоб-китоб қилинишини билдирган. Кейинроқ Президент Шавкат Мирзиёев Хоразмда юзага келган вазиятни ҳал қилиш учун бош вазир Абдулла Ариповни ҳудудга юборган. Шу куни Чондирқиётга кўчирилган аҳолига 1—2 ой аввал ваъда қилинган компенсация пуллари тарқатила бошланди. Бош вазир йиғилиш ўтказиб, Урганч шаҳри ҳокими ва прокурорига ҳайфсан берган. Бундан буён компенсация тўланмаган ва олдиндан огоҳлантирилмаган турар ва нотурар жойларни бузиш тўхтатиладиган бўлди.
Урганч шаҳар ҳокими Шуҳрат Абдуллаев автомобиль йўлини тўсиб қўйган аҳоли вакилларига бирор чора кўриладими деган саволга жавоб берди.
«Ҳеч кимга тазйиқ ўтказилмади. Бундан кейин ҳам уларга ҳеч қандай тазйиқ бўлмайди. Бу мумкин эмас», — дея таъкидлади ҳоким.
Чондирқиётга кўчирилган бир нечта аҳоли вакили ҳам йўлини тўсиб қўйиб, компенсация пулини тезроқ беришларини талаб қилганларга ҳеч қандай босим ўтказилмаганини билдирди.
«Юксалиш» умуммиллий ҳаракати раиси Акмал Бурҳонов Ўзбекистонда аҳоли ва ҳокимлик вакилларининг очиқ конфронтациясига сабаб бўлаётган кўчмас мулкларни оммавий бузиш жараёнларидан ташвишда эканини маълум қилди. Шунингдек, адлия вазири Русланбек Давлетов 27 июль кунидаги ҳайъат мажлисида «Одамларнинг уйини бузиб, кўчага чиқариб қўйиб, компенсация тўламаслик — ваҳшийлик!» деди.
Изоҳ (0)