Ўзбекистон Демократия ва инсон ҳуқуқлари институти раҳбари Сайёра Хўжаева Facebook’даги саҳифасида Фарғона вилояти Риштон туманидаги уй бузилишлари юзасидан унга мурожаатнома келиб тушганини маълум қилди.
Мурожаатнома Риштон тумани Оқ-ер қишлоғи А.Темур кўчасида яшовчи фуқаролардан келиб тушган.
«Вилоят ҳокимлиги бошчилигидаги раҳбарлар ва туман ҳокимлиги ишчи гуруҳи мутасаддилари … тинч яшаб турган аҳолини ҳеч қандай олдиндан огоҳлантирмасдан туриб, Рамазон ойининг 15-кунидан бошлаб халқнинг тинчлигини буздилар ва қўшимча ишчи гуруҳини вилоят бўйича йиғиб, махсус техникалар ёрдамида уйлар бузиб ташланди», — дейилади ҳужжатда.
Қайд этилишича, бузилишдан олдин ҳар бир хонадонга баҳолаш фирмалари келиб, халқнинг уйини баҳолаган. Қурилиш материаллари давлат томонидан таъминланиши, «снос» пуллари тўланиши ваъда қилинган. Энди эса «снос» пуллари ҳам берилмаяпти, арзон нархлардаги қурилиш материаллари ҳам йўқ. Моддий ёрдам сифатида 10 миллион сўм берилган, холос.
«Фарғона вилояти, Риштон тумани бўйича мана шундай маълумот бугун Daryo — Live’да эълон қилинди: «Риштондаги воқеаларнинг қисқа хроникаси. Туман ҳокими ишдан олинди ,..айтишларича, ҳозирда уйи бузилганларга барча компенсациялар тўлиқ берилиб, уларга уй-жой қуриш ишлари кетмоқда».
Аммо, бу важлар ёлғон эканлиги мана бу, бизга келган мурожаатномадан ва ҳозиргина телефонда Риштон туманидан келган хабарга қараганда, компенсациялар тўлиқ берилди деган маълумот, ЁЛҒОН эканлиги маълум бўлди! Кимни Фарғона вилояти ҳокими алдаяпти? Велосипедда юриб, популизм билан шуғулланиш ўрнига, аҳолининг пулини тўлиқ бермайдими?» — дея вазиятга ўз муносабатини билдирган Сайёра Хўжаева.
Изоҳ (0)