Андижон вилояти Юксалиш қишлоғида туғилган 3 ёшли Хусан ўтган ҳафтада «Бола юрагини қутқаринг» (SACH) хайрия ташкилоти ҳамкорлигида Исроилнинг «Volfson» тиббиёт марказида жарроҳлик амалиёти муваффаққиятли ўтказилган ўзбекистонлик биринчи бола бўлди.
Исроилнинг Ўзбекистондаги элчихонаси матбуот хизмати хабар беришича, бола ва унга ҳамроҳлик қилган онасининг Исроилга парвоз қилиши, шифохонага жойлаштирилиши, у ерда яшаши ва реабилитация даври билан боғлиқ бўлган барча харажатлар «Бола юрагини қутқаринг» жамғармаси томонидан қопланган.
«Бола юрагини қутқаринг» Исроил халқаро хайрия ташкилоти бўлиб, у дини ёки миллатидан қатъий назар дунёнинг кўплаб мамлакатларидаги болаларда учрайдиган юрак хасталикларини даволаш ва уларнинг кейинги тиббий парваришини таъминлаш билан шуғулланади.
SACH ташкилоти 1995 йили ташкил топган бўлиб, ўтган давр мобайнида ташкилот дунёнинг 60 та мамлакатидан бўлган, жаъми 5000 боланинг ҳаётини сақлаб қолган ва кўплаб мамлакатларда фаолият юритаётган 120 дан ортиқ тиббий гуруҳларни тайёрлашга эришган.
Исроилнинг Ўзбекистондаги элчихонаси Соғлиқни сақлаш вазирлиги билан биргаликда «Бола юрагини қутқаринг» ташкилоти вакилларининг шу йили Ўзбекистонга ташрифини уюштириш билан шуғулланмоқда.
Изоҳ (0)