Тошкент вилоятининг Бўстонлиқ туманида Чимён қишлоғига олиб борувчи 4Р 6 «Тошкент—Чирчиқ—Чимён» автомобиль йўлининг 69—72 километрлари оралиғида «Уч терак» қишлоғи ҳудудида йўлнинг қатнов қисми тупроқ кўчкиси натижасида жиддий зарар кўриб, қатнов қисми ёпилди. Бу ҳақда Тошкент вилояти ИИББ ЙҲХ бошқармаси матбуот хизмати маълум қилди.
Қайд этилишича, ушбу автомобиль йўлининг «Галавасой», «Уч терак», «Чимён» ва «Навобод» қишлоқларидан ўтган қисмида автобус ва микроавтобусларнинг хавфсиз ҳаракатланишини таъминловчи омиллар, яъни техник воситалар билан тўлиқ жиҳозланмаган.
Шу сабабли ушбу транспорт воситалари Бўстонлиқ туман йўллардан фойдаланиш унитар корхонаси томонидан таъмирлаш ҳамда муҳофазаловчи тўсиқларни ўрнатиш ишлари якунлангунига қадар вақтинча ҳаракатланиши чекланди. Бу жамоат транспортлари фақат Бўстонлиқ тумани Чорбоғ қўрғони 4Р 12 «Бектемир—Чирчиқ—Чорбоғ» йўлининг 74 километригача (Янги бочка) ҳаракатланишлари мумкин.
Ҳозирда эски айланма йўл орқали енгил автомобиллар ҳаракатига вақтинча рухсат берилган.
Изоҳ (0)