Владимир Зеленскийнинг партияси Олий Рада сайловларида биринчиликда кетмоқда

Владимир Зеленскийнинг партияси Украина Олий Радасига муддатидан олдин ўтказилаётган сайловларда етакчилик қилмоқда, деб хабар беради Медуза.

Маълумотларга кўра, «Халқ хизматкори» партияси жами овозларнинг 42—44 фоизига эгалик қилмоқда. Шунингдек, партия штабининг маълум қилишича, дастлабки натижалар бўйича партия вакиллари Киевнинг барча округида биринчиликда кетяпти.

Виктор Медведчукнинг «Мухолифат платформа — Ҳаёт учун» партияси эса 11—12 фоиз овоз билан иккинчи ўринда кетмоқда. Медведчук партия сайлов натижаларидан қониқмаётганини ва «курашнинг янги босқичига» тайёргарлик кўришини маълум қилиб улгурди. Шунингдек «Мухолифат платформа», «Халқ хизматчиси»га ёрдам беришга тайёр эканлигини, бироқ Проевропа партиялари билан ҳамкорлик қилмаслигини билдирган.

Святослав Вакарчукнинг «Овоз» партияси эса 6 фоиздан ортиқроқ овоз тўплади. Украина собиқ президенти Пётр Порошенко ҳамда собиқ бош вазири Юлия Тимошенконинг партияси тахминларга кўра, 8 фоиз овоз тўплайди. Қолган партиялар эса Олий Радага кира олмаслиги мумкин.

Қонунга кўра, Олий Рададаги 450 депутатнинг ярми сиёсий партиялар рўйхати бўйича, қолган ярми эса — бир мандатли округлар бўйича сайланади. Қримнинг Россияга қўшилиши ҳамда Донецк ва Луганск вилоятларининг бир қисми сепаратист бошқарувида бўлгани сабаб бир мандатли 225 нафар депутат ўрнига 199 нафар танланади. Жами депутатлар сони 424 нафар бўлади.

21 июль соат 21:50 даги вазиятга кўра, сайловчиларнинг 49,39 фоизи овоз бериб улгурган.